यस्तो बन्दैछ माओवादीको केन्द्रीय कमिटी

पार्टीका सबै तहमा समावेशी प्रतिनिधित्व सुनिश्चित गर्ने निर्णय गरेको नेकपा (माओवादी केन्द्र)मा ५० प्रतिशत केन्द्रीय सदस्य समावेशी समानुपातिक सिद्धान्तका आधारमा निर्वाचित हुने भएका छन् । काठमाडौँमा जारी आठौँ राष्ट्रिय महाधिवेशनले बिभिन्न क्लस्टर मिलाएर केन्द्रीय कमिटीलाई समावेशी बनाउने विधान पारित गरेको हो ।

बिधानअनुसार अब केन्द्रीय कमिटीमा खुलाबाट ५० प्रतिशत र समानुपातिक समावेशी क्लस्टरबाट ५० प्रतिशत निर्वाचित हुनेछन् । समानुपातिकतर्फ खस-आर्य,दलित, मुस्लिम, मधेसी,आदिवासी जनजाति, थारु, अपाङ्गता भएका व्यक्ति, पिछडिएको क्षेत्र, युवा र महिलाको प्रतिनिधित्व हुनेछ ।

केन्द्रीय कमिटीमा सबै क्लस्टर र खुलाबाट गरी ३५ प्रतिशत महिला र २० प्रतिशत ४० वर्षमुनिका युवाको प्रतिनिधित्व विधानले सुनिश्चित गरेको छ । समानुपातिकतर्फ खस-आर्यबाट ५४ जना निर्वाचित हुनेछन् । जसमा १२ जना पुरुष र २४ जना महिला रहनेछन् । त्यस्तै, पुरुष युवा ३ र महिला युवा ६ जना निर्वाचित हुने व्यवस्था विधानमा छ ।

त्यसैगरी, २२ जना निर्वाचित हुने दलिततर्फ ६ पुरुष र १२ महिलाको प्रतिनिधित्व रहने छ । दलितबाट महिला युवा ३ र पुरुष युवा १ निर्वाचित हुनेछन् । मुस्लिमतर्फ ७ जना निर्वाचित हुँदा १३ जना महिला, ३ जना महिला युवा, १ पुरुष र १ पुरुष युवा समेटिने छन् ।

मधेसीतर्फ २३ जना निर्वाचित हुनेछन् । जहाँ १३ महिला, ६ पुरुष, ३ महिला युवा र १ पुरुष युवाको प्रतिनिधित्व रहनेछ । त्यस्तै, आदिवासी जनजातितर्फ ४३ जना निर्वाचित हुने विधानको व्यवस्था छ । जसमा २३ जना महिला, ११ जना पुरुष, ६ महिला युवा र ३ पुरुष युवा निर्वाचित हुनेछन् । थारूतर्फ १० जना निर्वाचित हुनेमा ६ जना महिला, २ जना पुरुष, १ जना पुरुष युवा र १ जना महिला युवा समेटिने छन् ।

अपाङ्गतातर्फ २ जना निर्वाचित हुनेमा १ पुरुष र १ महिला रहनेछन् । त्यस्तै, पिछडिएको क्षेत्रबाट पनि २ जना निर्वाचित हुनेमा एक-एक जना महिला पुरुष हुनेछन् ।

माओवादीको कूल केन्द्रीय सदस्य २९९ हुनेछ । जसमा खुलातर्फ १४५ जना निर्वाचित हुनेछन् । विधानमा केन्द्रीय समितिले थप १५ प्रतिशत सदस्य मनोनयन गर्ने व्यवस्था छ ।

हिजो पारित विधानले समावेसी चरित्रको केन्द्रीय कमिटी चयन गर्ने व्यवस्था गरे पनि कुन विधिद्वारा कमिटी गठन गर्ने भन्नेमा माओवादीले निर्णय गरिसकेको छैन । निर्वाचन समितिले निर्वाचन कार्यक्रम सार्वजनिक गरेता पनि सहमति जुटाउन भन्दै आज १ बजेसम्म बन्दसत्र स्थगित गरिएको छ। त्यसअघि स्थायी कमिटी बसेर सहमतिको प्रयास गर्ने बताइएको छ ।