भक्तपुरमा बसको ठक्करबाट महिलाको मृत्यु

भक्तपुरमा बसले ठक्कर दिदाँ एक महिलाको ज्यान गएको छ । आज दिउँसो करिब साढे २ बजेको समयमा बसले मोटरसाइकललाई ठक्कर दिँदा मोटरसाईकलमा सवार एक महिलाको ज्यान गएको हो ।

सूर्यविनायक नगरपालिका वडा नं. ९ नलिन्चोक बाँसघारीस्थित अरनिको राजमार्गमा बनेपाबाट काठमाडौँतर्फ आइरहेको बा ५ ख ३०२० नं को यात्रुबाहक बसले बा ७० प ९१३८ नं को मोटरसाईकललाई ठक्कर दिएको थियो ।

ठक्करबाट मोटरसाईकलमा पछाडि सवार दोलखा गौरीशंकर गाउँपालिका वडा नं २ घर भई हाल नलिन्चोक बस्ने अन्दाजी ४० बर्षकी गंगा बस्नेत गम्भिर घाइते भएकी थिइन् । उनलाई उपचारको लागि भक्तपुर अस्पताल लगिएको तर, उपचारकै क्रममा उनको मृत्यू भएको प्रहरीले जनाएको छ ।

महानगरीय प्रहरी परिसर भक्तपुरले बताएअनुसार ठक्कर दिने बस र चालक भने प्रहरी नियन्त्रणमा रहेका छन् । चालक काभ्रेको बनेपा नगरपालिका वडा नं ९ का ४१ बर्षीय रविन श्रेष्ठ रहेको प्रहरीले बताएको छ ।