दाईले भाइलाई दिउँसै खुकुरीले छप्काए

सिन्धुलीमा आफ्नै दाइले भाइलाई खुकुरी प्रहार गरेका छन् । कमलामाई नगरपालिका-५ चिसापानीका ३५ वर्षीय दिपक दाहालले ३० वर्षीय भाइ कुमार दाहाललाई हिजो दिउँसो खुकुरीले छप्काएका हुन्।

भाइलाई खुकुरी हान्ने दाइ पक्राउ परेका छन् । दिपकले आफ्नै भाइलाई खुकुरी प्रहार गर्दा घाइते भएको भन्ने खबर पाएपछि जिल्ला प्रहरी कार्यालय सिन्धुलीबाट खटिएको प्रहरीले उनलाई पक्राउ गरेको हो ।

खुकुरी प्रहारबाट गम्भीर घाइते भएका कुमारको जिल्ला अस्पताल सिन्धुलीमा सामान्य उपचार पश्चात थप उपचारको लागि धुलिखेल पठाइएको छ । घटना सम्बन्धमा थप अनुसन्धान भैरहेको प्रहरीले जनाएको छ ।