रेड पाण्डाको छाला खोज्दै प्रहरी सानेपादेखि नयाँ बसपार्कसम्म

ललितपुरको सानेपामा रेड पाण्डाको छाला लुकाएको सुराकीको आधारमा प्रहरीले काठमाडौंको नयाँ बसपार्क नजिकै उक्त छालासहित एक जनालाई पक्रेको छ ।

दुई थान छालासहित रुकुम पश्चिमको बाफिकोट गाउँपालिका ५ घर भई काठमाडौं नयाँ बसपार्कस्थित मञ्जुश्री मार्ग बस्ने २५ वर्षीय नवराज केसीलाई महानगरीय प्रहरी वृत्त सातदोबाटोबाट खटिएको प्रहरी टोलीले आज साँझ पक्राउ गरेको हो ।

यसअघि सानेपा हाइटमा रेड पाण्डाको छाला लुकाई राखेको सूचनापछि खटिएको प्रहरीले उक्त छाला बोकेर केसी नयाँ बसपार्क पुगेको पत्तो लगाएको हो । उनलाई पछ्याउँदै जाँदा नयाँ बसपार्क नजिकैबाट रेड पाण्डाको छालासहित फेला पारिएको बताइएको छ ।