ओछ्यानमै बृध्दाको हत्या,अघोरी बाबाहरु बेपत्ता

उदयपुरको त्रियुगा नगरपालिका-१३ बेहर्डवास्थित ६६ वर्षीया सुखरीदेवी चौधरीको हत्या भएको छ । घरमा कोही नभएको मौका छोपी गरगहना लुटपाट गरेर उनकाे हिजो राति हत्या भएकाे प्रहरीले बताएको छ ।

चौधरीलाई ओछ्यानमा हत्या गरी छाडेको अवस्थामा भेटिएको श्रीमान बच्चुलालले बताए । श्रीमतीलाई घरमा छाडेर गाईघाट बजार गएका बच्चुलाल घर फर्किदा सुखरीदेव मृत अवस्थामा फेला पारेको उनले बताए ।

दिउँसो गाउँमा भारतीय मूलका दुई जना कालो कपडा लगाउने अघोरी बाबा आएको स्थानीयबासीले बताएका छन् । घटनास्थलमा मृतकले लगाएको नाक,कानको गहना लुटपाटको अवस्थामा फेला परेको थियो । मृतक चौधरीको शव राति नै प्रहरीले पोष्टमार्टमका लागि जिल्ला अस्पताल गाईघाट लगेकाे छ ।

घरमा उनलाई मात्र छाडेर अन्य सदस्य बाहिर गएको मौकामा हत्या गरेको हुनसक्ने प्रहरीको भनाइ छ । घटनाबारे अनुसन्धान भइरहेकाे जिल्ला प्रहरी कार्यालय उदयपुरले जनाएको छ ।