ट्राफिक नियम तोडेर भागेका पाँच दर्जनमाथि कारवाही,सिसिटिभी हेरेर पक्राउ

ट्राफिक नियम उल्लंघन गरी फरार भएका ६३ वटा दुई पाङ्ग्रे सवारी साधनका चालकलाई ट्राफिक प्रहरीले कारबाही गरेको छ । सीसीटीभीमा कैद भएको भिडियोका आधारमा लेन उल्लंघनमा ३१ जना, एकतर्फी सडकमा सो विपरीत सवारी साधन चलाएका २३ जना र सवारी मोड्न निषेध गरेको स्थानमा सवारी साधन मोडेका ८ जना चालकलाई कारबाही गरेको हो ।

यात्रु लिन नमानेको कसूरमा एकजना चालकलाई पनि कारबाही गरेको काठमाडौं उपत्यका ट्राफिक प्रहरी कार्यालयले जनाएको छ । भदौ १ गते १४ गतेसम्म काठमाडौं उपत्यकाका विभिन्न स्थानमा ट्राफिक नियम उल्लंघन गरेका ४२० जना चालकमध्ये ट्राफिक प्रहरीले खोजी गरी आएका ९७ चालकमध्ये ६३ जनालाई आज कारबाही गरिएको हो ।

अन्य चालकहरू हालसम्म फरार रहेकाले खोजी भइरहेको उपत्यका ट्राफिक प्रहरी कार्यालयले जनाएको छ ।