गायकका दुई श्रीमती, तीन तनाव

नेपाली मूलका चर्चित भारतीय गायक उदितनारायण झा विवादबाट खासै टाढा रहँदैनन् । एक महिनाअघि मात्रै कन्सर्टमा महिला फ्यानलाई चुम्बन गरेर विवादमा तानिएका उनी फेरि जेठी पत्नीसँगको लफडाले चर्चामा आएका छन् । 

सप्तरीको राजविराजमा जन्मिएका र लामो समय काठमाडौँमा संघर्ष गरेका उनले सन् १९८४ मा रञ्जनासँग पहिलो बिहे गरेका थिए । तर बिहेको एक वर्षमै उनले गायिकासमेत रहेकी एयर होस्टेज दिपा गहतराज (झा)सँग दोस्रो बिहे गरे । अहिले उनै जेठी पत्नी रञ्जनाले सम्बन्ध तथा वैवाहिक अधिकार पुनःस्थापनाको लागि सुपौल पारिवारिक अदालतमा मुद्दा दायर गरेपछि उदितनारायण पुनः चर्चामा आएका हुन् । 

उदितनारायणले अधिकार हनन गरेको र सम्पत्ति हडपेको आरोपसहित मुद्दा दायर भएको छ । मुम्बईस्थित उदितनारायणको घरमा जाँदा आफूलाई गुण्डा लगाएर निकालिएको आरोप लगाउँदै  रञ्जनाले हालसम्म आधिकारिक डिभोर्स नभएको र बुढेसकालमा सँगै बस्न चाहेको बताएकी छन् । संघर्षको समयमा आफूहरु सँगै रहेको र सफल भएपछि उदितनारायणले छाडेको गुनासो गरिन् ।

उता उदितनारायणले भने रञ्जनाको चाहनासँग सहमत हुन नसकिने जवाफ दिएका छन् । अस्ति आइतबार अदालतमा उपस्थित भएका उनले रञ्जनाले ‘ब्ल्याकमेल’ गरिरहेको पनि जिकिर गरे । रञ्जनालाई एक करोड भारु बराबरको घर र खेत दिएको, भरणपोषण खर्चवापत् मासिक १५ हजार भारु दिँदै आएकोमा सन् २०२१ देखि बढाएर २१ हजार दिन थालेको उदितनारायणको दाबी छ । 

बिहार महिला आयोगले भने उदितनारायणले रन्जनालाई २५ लाख बराबरको गहना र जमिन मात्र दिएको बताएको छ । रञ्जनाले सहयोगको याचना गरेपछि आयोगले न्याय दिलाउन भन्दै अदालतमा समेत छुट्टै वकिल पठाएको भारतीय सञ्चारमाध्यमले जनाएका छन् । 

स्मरणीय छ, उदितनारायण बेला–बेलामा नागरिकताको कारण पनि विवादमा आइरहन्छन् । नेपालमै जन्मिएका उनले नागरिकता भारतको बिहारबाट बनाएकोमा कतिपय सप्तरीबासीले आलोचनासमेत गर्दै आएका छन् ।