डिपार्टमेण्ट स्टोरबाट सामान चोर्ने चण्डोलमा समातिए

काठमाडौं महानगरपालिका २८ पुतलीसडकमा मुख्य कार्यलय रहेको योयोसो डिपार्टमेन्ट स्टोरको विभिन्न शाखाबाट सामान चोरी गरेको आरोपमा प्रहरीले एक जनालाई पक्राउ गरेको छ ।

पक्राउ पर्नेमा काठमाडौं महानगरपालिका–९ गौशाला घर भई हाल वडा नम्बर ४ मा बस्ने ५१ वर्षीय मुना सिंह हुन् । उनलाई चण्डोलबाट काठमाडौं उपत्यका अनुसन्धान कार्यालयको टोलीले पक्राउ गरेको हो ।

उनले योयोसो सुपर मार्केटको विभिन्न शाखा कार्यालयबाट सामान किन्ने बहानामा चोरी गर्दै आएको प्रहरीले जनाएको छ । मुनाको साथबाट प्रहरीले जिजी कम्पनीको सानो हाते पंखा एक थान, एम लेखिएको सानो हाते पंखा एक थान, चार थान हुक, वुडन मिरर लेखिएको एक थान ऐना, नौ थान टेबुल, जेन्स अन्डरवेयर तीन थान, स्पिकर एक थान, मोबाइल एक थान र प्रदेश ३–२००६ प ४३१७ नम्बरको यामाहा स्कुटर एक थान बरामद गरेको छ ।

पक्राउ परेका उनीमाथि आवश्यक कारबाहीको लागि जिल्ला प्रहरी परिसर काठमाडौं पठाइएको काठमाडौं उपत्यका अनुसन्धान कार्यालयले जनाएको छ ।