चन्द्रगिरिको जंगलमा फसेका ३ विदेशीको डोरीले उद्धार

चन्द्रागिरि जंगलमा फसेका तीन जना विदेशी नागरिकको सकुशल उद्दार भएको छ । घुम्नका लागि पुगेका उनीहरु बाटो भुलेर जंगलमा फसेका थिए । थानकोटबाट करिब सात किलोमिटर माथि थानकोट–चित्लाङ सडकखण्ड नजिकैको भीरमा फसेको अवस्थामा प्रहरी बृत्त थानकोटको टोलीले उनीहरुलाई फेला पारेर उद्धार गरेको हो ।

सानेपास्थित प्रहरी प्रभागमा यसबारे सूचना आएपछि प्रहरी बृत्त थानकोटबाट तत्कालै उद्दारकर्मी परिचालन गरिएको थियो । हिजो साँझ आएको सो खबरपछि आवश्यक टर्च, डोरी, स्ट्रेचरलगायतका सामाग्रीसहित १० जनाको प्रहरी टोली परिचालन गरिएको जिल्ला प्रहरी परिसर काठमाडौंका प्रवक्ता दिनेशराज मैनालीले जानकारी दिए ।

उद्धार भएकाहरुमा अमेरकी नागरिक ३४ वर्षीय डग्लस रो, ३० वर्षीय भारतीय नागरिक नवप्रित डिलोन र २९ वर्षीय माधव गुप्ता रहेका छन् । उनीहरुलाई रेस्क्यु रोपलगायतको प्रयोग गरी सुरक्षित साथ उद्दार गरी हिजो राति नै साथीहरुको जिम्मा लगाइएको मैनालीले बताए ।