पूर्व विद्यार्थीद्वारा दुई प्राध्यापकको हत्या

इराकमा आफ्नै पूर्वविद्यार्थीले प्राध्यापकहरूको गोली हानेर हत्या गरेका छन् । उत्तरी इरबिल प्रान्तमा रहेको विश्वविद्यालयका दुई प्राध्यापकका कारण आफू विश्वविद्यालयबाट निष्कासनमा परेको भन्दै विद्यार्थीले गोली हानी हत्या गरेका हुन् ।

प्रान्तीय गर्भनरका अनुसार मृतक प्राध्यापकमध्ये एक जना डिन हुन् । उनको शरीरका विभिन्न भागमा पाँच वटा गोली लागेको छ । अर्का इन्जिनियरिङ विषयका प्राध्यापक थिए । आक्रमणकारी सोरन युनिभर्सिटीका पूर्वविद्यार्थी हुन् ।

उनलाई केही समयअघि विश्वविद्यालयबाट निकालिएको थियो । केही महिनाअघि इराकी प्रधानमन्त्री मुस्तफा अल काधिमीमाथि बगदादको ग्रीनजोनमा रहेको प्रधानमन्त्रीको उच्च सुरक्षा व्यवस्था रहेको निवासमा ड्रोन हमला भएको थियो । उक्त हमलालाई अमेरिकाले आतङ्कवादको संज्ञा दिएको थियो ।