बन्दाकोभीको बोराभित्र डेढ क्विण्टल गाँजा

मोरङमा तरकारी बोकेको ट्रकमा गाँजा फेला परेको छ । तरकारीभित्र लुकाएर भारततर्फ लैजान खोजिएको अवस्थामा १५६ केजी गाँजा बरामद भएको हो ।

प्रहरीले रानी भन्सार नजिकै उक्त गाँजा फेला पारेको हो । हिजो राति ११ बजेको समयमा तरकारी लोड गरिएको भनिएको प्र.१–०२–००१ख८६७७ नम्बरको मिनी ट्रक चेकजाँच गर्दा छ वटा बोरामा उक्त परिमाणको गाँजा फेला परेको हो ।

जिल्ला प्रहरी कार्यालय मोरङका अनुसार धनकुटाको शहीदभूमि गाउँपालिका–३, छिन्ताङका २९ वर्षीय विवेक राईले चलाएको मिनी ट्रकमा ४६ बोरा बन्दाकोभी थियो । बाँकी छ वटा बोरामा गाँजा पाइएको हो ।

प्रहरीले मिनिट्रक, चालक, तरकारी र गाँजा नियन्त्रणमा लिएर अनुसन्धान थालेको छ ।