कसले दियो यिनलाई नक्कली क्याप्टेनको पोशाक र दर्जा ?

जाजरकोटमा नेपाली सेनाको क्याप्टेन हुँ भन्दै हिँड्ने व्यक्ति पक्राउ परेका छन् । नलगाड नगरपालिका–१३ खातीगुर्ताका २७ वर्षीय विष्णु गिरीलाई नक्कली कागजातसहित प्रहरीले समातेको हो ।

इलाका प्रहरी कार्यालय दल्लीका अनुसार सरकारी छाप, दस्तखत दुरुपयोग गरी नक्कली परिचयपत्र बनाएर आफूलाई क्याप्टेन बताउँदै हिँड्ने गरेको गोप्य सूचनाका आधारमा प्रहरी टोलीले उनलाई सप्रमाण गिरफ्तार गरेको हो ।

उनको साथबाट सहसेनानी दर्जामा खिचाइएको फोटोवाला नक्कली परिचयपत्रसहित केही कार्ड फेला परेको प्रहरी निरीक्षक पुष्कर पन्तले बताए।

गिरीलाई हिरासतमा राखेर सोधपुछ गर्नको लागि जिल्ला अदालतले पाँच दिनको म्याद दिएको छ ।