दलबलसहित मनोनयनका लागि हिँडेका उम्मेदवारले वीचैमा कित्ता फेरेपछि दुबै गठबन्धनमा भाँडभैलो

टिकटका लागि चुनावको मुखमा पार्टी फेर्ने प्रवृत्ति नेपाली राजनीतिको विशेषताजस्तै भैसकेको छ । वर्षौँसम्म पसिना बगाएर बनाएको पार्टी छोडेर रातारात अर्को खेमामा पुगी टिकट हत्याउने सिलसिला यसपटक पनि उस्तै रह्यो ।

आफ्नो टिकट सुरक्षित गर्न ‘इधर उधर’ गर्नेहरु यसचोटी सबैभन्दा बढी मधेस प्रदेशमा देखिए । त्यसमध्ये अधिकांश मधेस केन्द्रित दल जसपा र लोसपा परित्याग गरी कांग्रेस र एमालेमा प्रवेश गरेर हाताहाती टिकट पाए । तर, यसपटक रमाइलो कुरा चैं पार्टीले टिकट दिँदादिँदै पनि अर्को पार्टीमा प्रवेश गरेर उम्मेदवारी मनोनयन गरेको पनि पाइयो ।

कपिलवस्तुमा जनता समाजवादी पार्टी (जसपा) बाट उम्मेदवारी दिन हिँडेका उम्मेदवार नै नेपाली कांग्रेस प्रवेश गरेका हुन् । एमाले-जसपा गठबन्धनबाट प्रदेशसभाका उम्मेदवार सहसराम यादव मनोनयन दर्ता गराउन दलबलसहित निर्वाचन अधिकृतको कार्यालयतर्फ हिँडेका थिए । तर,बीच बाटोबाटै कांग्रेस प्रवेश गरेर उम्मेदवार बनेपछि उक्त क्षेत्रमा जसपाले उम्मेदवारी नै दिन पाएन ।

दुई पार्टीबीच भएको सहमतिअनुसार जिल्लाको तीन प्रतिनिधिसभा र ४ प्रदेशसभा एमालेले लिएर दुई प्रदेशसभा जसपालाई छुट्याईएको थियो । सोहीमुताविक हिजो बिहान दुवै दल मिलेरै मनोनयन दर्ता गर्ने तयारी थियो ।

तर,छाता चिन्हबाट उम्मेदवार बन्ने ‘कन्फर्म’ भैकन मनोनयनका लागि हिँडेका यादव कांग्रेसको उम्मेदवार बनेपछि दुबै गठबन्धनमा रडाको मच्चियो । सहमति तोडेर जसपाका उम्मेदवार काँग्रेसमा छिरेपछि गठबन्धन तोड्दै त्यहाँ एमालेले उम्मेदवारी दर्ता गराएको छ । त्यसको ‘काउन्टर’ मा एमालेले पाएको अर्को क्षेत्रमा जसपाले उम्मेदवार खडा गरेको छ ।

यता,यादवको कांग्रेस प्रवेश र त्यस क्षेत्रको उम्मेदवारीले सत्ता गठबन्धनमा भाँडभैलो भएको छ । सो क्षेत्र गठबन्धनमा एकीकृत समाजवादीले पाएको थियो । तर,गठबन्धनको मर्मविपरित जसपाबाट आएका यादवलाई कांग्रेसले उम्मेदवार बनाएपछि एकीकृत समाजवादीले अलग्गै उम्मेदवारी दिएको छ ।