वीरगञ्जबाट लागूऔषध सोझै लमजुङ

लमजुङमा प्रहरीले लागुऔषधसहित दुई जनालाई पक्राउ गरेको छ । वीरगञ्जबाट बेंसीसहर आएको बसका दुई युवक लागुऔषधसहित पक्राउ परेका हुन् ।

आज बिहान सदरमुकाम शेराको पृथ्वी बस काउन्टर नजिकै बसिरहेका उनीहरुको साथबाट लागुऔषध फेला परेको हो । उनीहरुको गतिविधि शंकास्पद देखिएको र जाँच गर्ने क्रममा झोलामा राखेर ल्याइएको २९ एम्पुल डाइजेपाम, २९ एम्पुल फेनरागन र २९ एम्पुल नुफिन फेला पारेको प्रहरीले जनाएको छ ।

डीएसपी प्रकाश श्रीमलका अनुसार बेंसीसहर नगरपालिका ८ का २२ वर्षीय दिपेन गुरुङ र ३० वर्षीय तेज गुरुङ पक्राउ परेका हुन् । उनीहरूको साथबाट दुई वटा मोबाइल पनि बरामद गरिएको छ ।

उनीहरुलाई आजै जिल्ला अदालतबाट आठ दिनको म्याद थपको अनुमति लिई लागुऔषध (नियन्त्रण) ऐन, २०३३ अनुसार थप अनुसन्धान कार्य थालिएको छ ।