मान्छे टोकेर स्याल बेपत्ता, घाइते ९ जना अस्पतालमा

रुकुम पश्चिमको मुसिकोट नगरपालिकामा स्यालको टोकाइबाट नौ जना घाइते भएका छन् । मुसिकोट नगरपालिकाको ४, ६, ७ र १० नम्बर वडाका उनीहरुलाई स्यालले टोकेको हो ।

घाइते हुनेमा ओमप्रकाश पाण्डे र एक्कीकुमारी बुढाथोकी, गेदलाल गिरी, रामबहादुर बोहरा, दीपा बोहरा, उर्मिला बोहरा, पत्रबहादुर महतारा, सविता गौतम र भूपेन्द्र बुढा छन् ।

घाइतेमध्ये एक्कीकुमारीलाई स्यालले अस्ति र अन्यलाई हिजो साँझ टोकेको मुसिकोट–६ का हिमबहादुर महताराले बताए । ट्याखोला, माथिल्लो घाइडाँडा, झिँजालगायत ठाउँमा स्यालको बिगबिगी बढेको छ । स्यालले घरमै बसेका तथा बाटोमा हिँड्नेलाई समेत टोक्न थालेको गाउँले बताउँछन् ।

घाइते एक्कीकुमारीलाई थप उपचारका लागि सुर्खेत ल्याइएको छ भने अन्यको जिल्ला अस्पतालमा उपचार भइरहेको छ । उनीहरूलाई रेबिजविरुद्धको खोप दिइएको छ । ह्रिसंक स्याललाई नियन्त्रणमा लिन सकिएको छैन ।