हराएका सवारी साधन धमाधम धनीलाई फिर्ता गर्दै ट्राफिक कार्यालय
काठमाडौं उपत्यका ट्राफिक प्रहरी कार्यालयले विभिन्न मितिमा हराएका दुई पाङ्ग्रे सवारी साधन सम्बन्धित धनीलाई हस्तान्तरण गरेको छ । कार्यालयले २३ वटा दुई पाङ्ग्रे सवारी साधन फिर्ता गरेको हो ।
आज एक कार्यक्रममा २० वटा मोटरसाइकल र तीन वटा स्कुटर धनीलाई बुझाएको प्रहरी उपरीक्षक (एसपी) अबिनारायण काफ्लेले बताए । यस आर्थिक वर्षको शुरुवातदेखि हालसम्म सवारी साधन हराएको भनि एक हजार १६२ वटा उजुरी परेको उनको भनाइ छ ।
तीमध्ये फेला परेका ३५३ वटा सवारी साधनमाथि कार्यालयले अनुसन्धान गरेको थियो । सोही क्रममा आज २३ वटासहित हालसम्म ३२८ वटा फिर्ता गरिसकेको एसपी काफ्ले जानकारी दिए ।
कार्यालयले फागुनमा मात्रै २४ वटा चोरीका मोटरसाइकल फेला पारेको थियो । यता, चोरी कार्यमा संलग्न २६ जनालाई आवश्यक कारबाहीका लागि सम्बन्धित प्रहरी कार्यालयमा बुझाएको कार्यालयले जनाएको छ ।
त्यस्तै, कार्यालयले आफ्नो सवारी साधन सुरक्षित स्थानमा पार्किङ गर्न, ह्वील लक, चेन लक, ह्यान्डिल लक, डिस्क लकलगायत सुरक्षा साइरनहरु जडान गरी चोरी तथा हराउनबाट रोक्न सुसूचित गराएको छ ।
टिप्पणीहरू