दुर्घटनाग्रस्त हेलिकोप्टर पाइलटलाई काठमाडौं ल्याईंदै

आज बिहान धौलागिरी हिमालको बेस क्याम्पमा भएको हेलिकोप्टर दुर्घटनामा क्याप्टेन प्रिया अधिकारी घाइते भएकी छन् । पाइलट अधिकारी एभरेष्ट हेलिको कल साइन ९ एन एएनबी हेलिकोप्टर लिएर म्याग्दीको ताकमबाट उडेको बताइन्छ । 

पर्वतारोहीहरुको मालसामानसहित गएको एभरेष्ट हेली बिहान ६ बजे त्यसतर्फ गएको थियो । धौलागिरी हिमालको इटाली बेसक्याम्पमा अतवरण गर्ने क्रममा हेलिकोप्टर अनियन्त्रित भएर कोल्टे परेको जानकारी दिइएको छ । 

प्रारम्भमा हेलिकोप्टर सम्पर्कविहीन भएको बताइए पनि मध्यान्हपछि पाइलट अधिकारी सम्पर्कमा आएकी हुन् । उनलाई एअर डाइनाष्टीको हेलिकोप्टरमा पोखरा ल्याइएको थियो । पोखरामा प्राथमिक उपचारपछि उनलाई सोही हेलिकोप्टरमा काठमाडौं ल्याउन लागिएको जानकारी दिइएको छ । घाइते अधिकारीको स्वास्थ्य अवस्था सामान्य नै रहेको एअर डाइनाष्टी स्रोतले बताएको छ ।