नातिनीको जन्मदिनमा बसन्तको अनौठो बधाइ

‘प्रेमिल कवि’को छवि बनाएका चर्चित कवि तथा गीतकार बसन्त चौधरीले आफ्नी नातिनी आहाना शाक्य (चौधरी) को जन्मदिनको अवसरमा बाल कविता संग्रह सार्वजनिक गरेका छन् । नातिनीको विद्यालयको सभाहलमा आयोजित समारोहमा कवि चौधरीद्वारा लिखित बाल कविता संग्रह ‘आहाना’ विमोचन गरिएको छ । 

उक्त बाल कविता संग्रह नेपाली र अंग्रेजी दुवै भाषामा उपलब्ध छ । ‘कोपिला किताब’ ले प्रकाशन गरेको आहानामा चौधरीका ५६ वटा बालकविता समेटिएका छन् । प्रत्येक कवितासँगै कलाकार भानु भट्टराईले तयार पारेको र आकर्षक चित्रांकनसमेत समेटिएकाले बालकविता संग्रह निकै आकर्षक रहेको बताइन्छ ।

कविता संग्रह विमोचन समारोहमा बोल्दै कवि चौधरीले आफू निकै खुशी भएको उल्लेख गरे । उनले भने, ‘यस्तो लागिरहेछ कि बसन्तको आगमन फेरि भएको छ । मन प्रफुल्लित छ ।’ नातिनीलाई सानैदेखि हेरेको र उनको उमेर बढेसँगै आफूले देखेका,भोगेका र नातिनीसँग बिताएका क्षण तथा नातिनीजस्तै भएर लेखिएका कवितालाई संग्रहको रुप दिएको बसन्तले बताए । कविता संग्रह आहाना आफ्नी नातिनीको प्रतिबिम्ब समेत भएको उनको भनाई छ ।

बालसाहित्यको महत्ववारे  चौधरीको भनाइ छ, ‘बाल साहित्य मेरो नियमित विधा होइन । यो मेरो पहिलो प्रयास हो ।’ उनले बाल साहित्यलाई व्यापारभन्दा पनि एउटा आन्दोलनको रुपमा लिन सुझाव दिएका छन् ।

कार्यक्रममा बोल्दै विद्यालयकी डाइरेक्टर पवित्रा लिम्बूले कवि बसन्त चौधरीले आफ्नी नातिनीका निम्ति जन्मदिनको दिन विशेष उपहार प्राप्त भएको बताइन् । हजुरबुबाबाट प्राप्त उपहार सबैलाई बाँड्न मिल्ने उल्लेख गर्दै लिम्बुले भनिन्, ‘चौधरीले नेपालको बालसाहित्यको उन्नतिमा निकै ठूलो उपहार दिनुभएको छ ।’  

कार्यक्रममा बालबालिकाहरुले कविता संग्रहका केही कविता वाचन पनि गरेका थिए । आहाना कवि चौधरीको साहित्यिक जीवनको पहिलो बाल कविता संग्रह हो । यसअघि उनका २० वटाभन्दा बढी कविता तथा गीति संग्रह प्रकाशित भइसकेका छन् । दर्जनौं चर्चित नेपाली गीतका उनी सर्जकसमेत हुन् ।

कवि चौधरी,उनकी पुत्री मेघा चौधरी, नातिनी आहाना शाक्य (चौधरी) तथा आहानाका पिता पारस शाक्य र बालबालिकाहरुले बालकविता संग्रह ‘आहाना’को सामुहिक लोकार्पण गरेका थिए ।