श्रीमती लिएर ससुरालीबाट फर्कंदा दुर्घटना, एकै परिवारका तीन जना बिते

महोत्तरीमा भएको सवारी दुर्घटनामा नवविवाहित दम्पतीको मृत्यु भएको छ । आज दिउँसो गौशालास्थित जंगलमा भएको सवारी दुर्घटनामा श्रीमान, श्रीमती र एक बालिकाको मृत्यु भएको बताइएको छ ।

मृत्यु हुनेमा सिरहा कल्याणपुर नगरपालिका–१० का २६ वर्षीय अमृत मण्डल, उनकी श्रीमती २४ वर्षीया अन्जु मण्डल र भतिजी ६ वर्षीया अंशु मण्डल छन् । विवाह भएको दुई महिनामै अमृत र अन्जुको दुर्घटनामा परेर निधन भएको हो । 

आज दिउँसो अमृतले ससुरालीबाट श्रीमतीलाई लिएर घरतर्फ जाँदै गर्दा जंगलमा रहेको रेल्वे ट्याक नजिकको मोडमा मोटरसाइकल बससँग ठोक्किँदा तीनै जना गम्भीर रूपमा घाइते भएका थिए । अमृत र अंशुको बर्दिवासस्थित शुभस्वस्तिक हस्पिटलमा उपचारको क्रममा ज्यान गएको जिल्ला प्रहरी कार्यालय महोत्तरीले जनाएको छ । त्यस्तै अन्जुको बर्दिबास ट्रमा सेन्टरमा उपचारको क्रममा ज्यान गएको हो ।

महोत्तरी प्रहरीका अनुसार गौशालाबाट बर्दिबासतर्फ गइरहेको मधेस प्रदेश ०१ ०१–००४ प ६८१९ नम्बरको मोटरसाइकल गौशालातर्फ आइरहेको बा.३ ख २३९६ नम्बरको बसमा ठोक्किएको थियो ।