लामो दूरीमा चल्ने सवारी साधनलाई अन्तरप्रदेशीय ईजाजत अनिवार्य

यातायात व्यवस्था विभागले लामो रोडमा सञ्चालन हुने सवारी साधनलाई अनिवार्य रुपमा अन्तरप्रदेशीय बाटो ईजाजत पत्र लिएर मात्र चलाउन अनुरोध गरेको छ । 

आज एक सूचना प्रकाशित गर्दै विभागले अन्तरप्रदेश सञ्चालन हुने सवारीसाधन (यात्रुवाहक र मालवाहक) लाई अन्तरप्रदेशीय बाटो ईजाजत अनिवार्य गरेको जानकारी गराएको हो । 

मुलुकभर सञ्चालित सवारी साधनको बाटो ईजाजत पत्र, स्तर कायम, जाँचपास र प्रदूषण परीक्षण गर्ने अधिकार विभाग मातहतका सवारी परीक्षण कार्यालय टेकु, ईटहरी, हेटौंडा, बुटबल र अत्तरीयालाई मात्र भएको र यी कार्यालयबाट अन्तरप्रदेशीय बाटो ईजाजत पत्र लिएर सवारीसाधन चलाउन विभागको अनुरोध छ । 

‘नेपालभर सञ्चालित सवारीसाधन (यात्रुवाहक÷मालवाहक) को बाटो ईजाजत पत्र, स्तर कायम, जाँचपास र प्रदूषण परीक्षण गर्ने अधिकार यस विभाग मातहतका सवारी परीक्षण कार्यालय टेकु, ईटहरी, हेटौंडा, बुटबल र अत्तरीयालाई मात्र भएको हुँदा अन्तरप्रदेश सञ्चालन हुने सवारीसाधनको अनिवार्य रुपमा उक्त कार्यालयबाट अन्तरप्रदेशीय बाटो ईजाजत पत्र लिएर मात्र सवारीसाधन सञ्चालन गर्न गराउन अनुरोध छ, सूचनामा भनिएको छ । 

विभागले अटेरी गरेर ईजाजत पत्र नलिई सवारी साधन सञ्चालन गरेमा सवारी तथा यातायात व्यवस्था ऐन, २०४९ तथा सोसम्बन्धी नियमावली, २०५४ बमोजिम कारबाही गरिने चेतावनीसमेत दिएको छ ।