‘समृद्ध नेपाल, सुखी नेपाली’ नारा अरुले उच्चारण गर्न नसकेको अध्यक्ष ओलीको दाबी

एमाले अध्यक्ष केपी शर्मा ओलीले एमाले बाहेक अरुले मुलुक र मुलुकबासीको समृद्धिको कुरै उठाउन छाडेको बताउनुभएको छ । उहाँले आफूहरू सरकारबाट हटेपछि झण्डै दुई वर्षदेखि कसैले पनि ‘समृद्ध नेपाल, सुखी नेपाली’ नारा उच्चारण गर्न नसकेको उल्लेख गर्नुभएको हो ।

पार्टीको विज्ञान तथा प्रविधि विभागले मुख्यालय, च्यासलमा आयोजना गरेको कार्यक्रमलाई सम्बोधन गर्दै उहाँले एमालेलाई सरकारबाट हटाइए पनि अरु कसैले समृद्ध नेपाल र सुखी नेपालीको उच्चारण गर्न नचाहेको बताउनुभयो । यसबाट पनि वर्तमान सरकार, गठबन्धनमा आबद्ध दलका नेताहरुको नियत छर्लङ्ग भएको उहाँको भनाई छ ।

मुलुक र जनताको समग्र विकासका लागि एमालेले उक्त नारा अघि सारेको उहाँको तर्क छ ।

विज्ञान तथा प्रविधिको चमत्कारलाई अब राजनीतिक सिद्धान्तले चुनौती दिन नसक्ने उहाँले ठहर गर्नुभएको छ । चीनको उच्च विकास आश्चर्यजनक रहेको उल्लेख गर्दै अध्यक्ष ओलीले भन्नुभयो, ‘अब कम्युनिज्मलाई च्यालेञ्ज गर्न वा परास्त गर्न कुनै पनि राजनीतिक थेउरीले सक्दैन । विकासले समाजको वर्गीय असमानतालाई पुर्ने भएकाले विकासको विकल्प छैन ।’