बुद्ध एअरको विमानमा फेरि समस्या, नेपालगञ्ज उडेको जहाज आकाशबाटै फिर्ता

बुद्ध एअरको उडिसकेको विमानमा समस्या देखिएपछि तत्काल काठमाडौं विमानस्थलमा अवतरण गराइएको छ । आज मध्यान्ह काठमाडौंबाट नेपालगञ्जतर्फ उडेको विमानलाई २२ मीनेटपछि फर्काइएको बताइएको छ ।

५२ जना यात्रु बोकेर विमान पौने १२ बजे उडेको थियो । विमानमा प्राविधिक समस्या उत्पन्न भएको थाहा पाएपछि चालकले विमानलाई नेपालगञ्जतर्फ अगाडि नलगेर काठमाडौं फिर्ता गर्ने निर्णय गरेको विमानस्थल स्रोतले बताएको छ ।

आकाशबाट फिर्ता भएको विमान १२ बजेपछि काठमाडौं विमानस्थलमा आकस्मिक अवतरण गरेको थियो । यसअघि पनि बुद्धका विमानमा प्राविधिक समस्या उत्पन्न भएपछि पटक पटक आकस्मिक अवतरण गराइएको थियो ।