खानेपानीको निहुँमा चन्द्रागिरीमा भाँडभैलो, मेयरमाथि ‘गुण्डागर्दी’को आरोप

आम उपभोक्ताले सञ्चालन गर्दै आएको खानेपानी उपभोक्ता समिति आफ्नो कब्जामा लिन खोजेपछि काठमाडौंको चन्द्रागिरी नगरपालिकामा लफडा भएको छ । नगरपालिकाले समिति आफ्नो स्वामित्वमा लिन खोजेको भन्दै त्यहाँ कार्यरत पदाधिकारीहरुले विरोध जनाएका छन् । 

कार्यपालिकाको बैठकबाट समितिका सबै अधिकार आफ्नो अधिनमा राख्ने निर्णय नगरपालिकाले गरेपछि द्वन्द्व सिर्जना भएको बताइन्छ । उक्त निर्णयप्रति असन्तुष्टि जनाउँदै ज्ञापनपत्र बुझाउन नगरपालिका पुगेका समितिका पदाधिकारीहरुलाई मेयर घनश्याम गिरीले ‘गेटआउट’ भन्दै अभद्र व्यवहार गरेपछि त्यहाँ भाँडभैलो मच्चिएको हो । 

समितिका पदाधिकारीहरुले मेयर गिरीलाई जथाभावी अभिव्यक्ति दिने कुनै अधिकार नभएको बताउँदै प्रतिवाद गरेपछि अवस्था तनावग्रस्त भएको हो । नगरपालिकाले समिति खारेज गर्ने गरी नयाँ विधेयक ल्याएर स्थानीय रूपमा काम गर्ने संस्थालाई हटाउने योजना बनाएको समितिका पदाधिकारीहरुको आरोप छ । आफूहरुले ज्ञापनपत्र बुझाउन खोज्दा मेयर गिरी ‘गुण्डागर्दी’ शैलीमा प्रस्तुत भएको महादेवस्थान खानेपानी उपभोक्ता समितिका सदस्य पुरुषोत्तम उदासले बताए ।

 

उपभोक्तामुखी ऐन नबनाई समितिमाथि निरकुंशता लाद्न खोजेकाले आफूहरुले विरोध जनाएको खानेपानी तथा सरसफाइ उपभोक्ता महासंघका केन्द्रीय अध्यक्ष राजेन्द्र अर्यालले बताए । नगरपालिकाले जबरजस्ती समितिलाई आफ्नो मातहतमा ल्याउन खोजेको उनको आरोप छ । 

यता, मेयर गिरी नगरपालिकाले उक्त निर्णय गरिसकेकाले पछि नहट्ने बताउँछन् । मातातीर्थ खानेपानी तथा सरसफाइ उपभोक्ता समितिलगायत सबै खानेपानी उपभोक्ता समिति गठन  गरेर तिनका सबै चल अचल सम्पत्ति नगरपालिकाले आफ्नो स्वामित्वमा राख्ने निष्कर्षमा पुगिसकेको उनको भनाई छ ।