कक्षा ११ मा छात्रवृत्ति कोटा निर्धारण गर्न काठमाडौँ महानगरपालिकाको विद्यालयहरुलाई निर्देशन

काठमाडौं महानगरपालिकाले कक्षा ११ मा छात्रवृत्ति कोटा निर्धारण गर्न शिक्षण संस्थाहरुलाई निर्देशन दिएको छ । 

महागरको शिक्षा विभागले आज सूचना प्रकाशित गर्दै कक्षा ११ मा भर्ना हुने विद्यार्थीहरुलाई कोटा निर्धारण गरेर छात्रवृत्ति उपलब्ध गराउन विवरणसमेत मागेको छ । शिक्षण संस्थाहरुलाई शैक्षिक सत्र २०७९-८० मा कक्षा ११ मा भर्ना भएका विद्यार्थीको संख्या असार मसान्तभित्र पठाउन महानगरले भनेको हो । 

महानगरपालिकाले विगतमा कक्षा ११ मा विद्यार्थी भर्ना गर्ने शिक्षण संस्थाहरुले फरक-फरक भर्ना तालिका तय गरेर छोटो अवधिको सूचना प्रकाशन गर्ने गरेको भन्दै त्यसलाई सच्याउन पनि निर्देशन दिएको छ । 

मुलुकका दुर्गम क्षेत्रबाट भर्नाका लागि काठमाडौं आउने विद्यार्थीहरु आवेदन दिने अवसरबाट वञ्चित भएको गुनासोप्रति आफ्नो गम्भीर ध्यानाकर्षण भएको जनाउँदै महानगरले यस्तो निर्देशन दिएको हो । 

एसईईको नतिजा सार्वजनिक भएको मितिबाट कम्तीमा १५ दिनसम्म आवेदन दिनसक्ने गरी कक्षा ११ वा सो सरहका तहमा भर्ना कार्यक्रम तय गर्न पनि महानगरले सबै शिक्षण संस्थालाई भनेको छ ।