कक्षा ११ मा छात्रवृत्ति कोटामा पढ्न चाहने विद्यार्थीका लागि आवेदन खुला

काठमाडौं महानगरपालिकाले संस्थागत विद्यालयमा छात्रवृत्ति कोटामा पढ्न चाहने विद्यार्थीसँग आवेदन मागेको छ । 

महानगरको शिक्षा विभागले आज सूचना प्रकाशित गर्दै कक्षा ११ मा अध्ययनरत विद्यार्थीलाई छात्रवत्तिका लागि आवेदन खुला गरेको जानकारी दिएको हो । विभागका अनुसार यही असार २८ गतेदेखि साउन १२ गतेसम्म अनलाइनबाटै फाराम भरेर आवेदन दिन सकिनेछ । 

आवेदन दिएका छात्रछात्राको परीक्षा साउन २० गते लिने कार्यतालिका समेत विभागले सार्वजनिक गरेको छ । परीक्षामा माध्यमिक तह कक्षा १० को पाठ्यक्रममा आधारित १०० वटा बहुवैकल्पिक वस्तुगत प्रश्न सोधिने विभागले जनाएको छ । 

विभागले विद्यालयगत छात्रवृत्तिको कोटा र परीक्षा केन्द्रसम्बन्धी विवरण यसपछि सार्वजनिक गर्ने पनि जानकारी दिएको छ ।