एन्टिबायोटिक औषधिको खोल बाहिर रातो धर्का अनिवार्य

औषधि व्यवस्था विभागले प्रतिजैविक औषधि (एन्टिबायोटिक) को लेबलमा अनिवार्य रातो धर्का राख्न औषधि उत्पादक तथा आयातकर्ताहरुलाई निर्देशन दिएको छ । 

विभागले प्रतिजैविक वर्गका औषधि प्राइमरी र सेकेन्डरी प्याकिङ सामग्रीको मौज्दात सकिएपछि वा निर्णय भएको मितिले बढीमा छ महिनापछि उत्पादन हुने औषधिमा अनिवार्य रुपमा रातो धर्का राख्न सुझाएको हो । 

विश्व स्वास्थ्य संगठनले ‘ग्लोबल एक्सन प्लान’ नेपालमा पनि तयार गर्नुका साथै लागू गर्ने चरणमा रहेकाले सोसम्बन्धी चेतनामुलक सन्देश प्रवाह गर्न र त्यसको परिपालना गराउन औषधि सल्लाकार समितिको ५५ औं बैठकबाट विभागलाई सिफारिस आएकाले यस्तो निर्देशन दिइएको जनाइएको छ ।

विभागले प्रतिजैविक औषधिहरुको अधिक, न्यून तथा अनावश्यक प्रयोग गर्दा उत्पन्न हुने प्रतिजैविक प्रतिरोधलाई न्यूनीकरण गर्न अन्तर्राष्ट्रिय प्रचलनअनुसार प्रतिजैविक औषधिहरुको प्राइमरी र सेकेन्डरी प्याकिङ्गको लेबलमा रातो धर्का लगाउने अभ्यास हुँदै आएको पनि स्मरण गराएको छ ।