कमरेडबीच यता पनि मिलेन कुरा

‘मन नपरेपछि मुखै अमिलो’ भनेजस्तो ‘आउँछु, गर्छु’ भन्दाभन्दै एमाले अध्यक्ष केपी ओलीले नमानेपछि पेशागत जिल्ला कमिटीका नेताहरू चित्त दुखाउँदै अधिवेशनमा जुटे । 

एमालेमा अहिले पनि एउटा त्यस्तो क्षेत्र वा कमिटी छ, जहाँ पार्टी फुटाएर माधव नेपालहरू बाहिरिँदासमेत पूर्व माधव नेपाल पक्षकै बहुमत छ । त्यो हो, कर्मचारीसहितका विभिन्न पेशाकर्मीलाई संगठित गर्ने अर्धभूमिगत संरचनाको उपत्यका पेशागत जिल्ला कमिटी । त्यसको अधिवेशन गत शनिवार च्यासलमा शुरु भई सोमबार बागबजारमा सम्पन्न भयो । र, माधव नेपालपक्षका पुराना मान्छे हावी भए ।

पहिला अध्यक्ष ओलीले उद्घाटन गर्ने भन्ने प्रचार थियो । त्यही दिन उहाँ उत्तरी काठमाडौंको धाप ड्यामतिर पत्नी राधिकासहित घुमफिरमा निस्कनुभयो । र, उद्घाटनमा भने वरिष्ठ उपाध्यक्ष ईश्वर पोखरेललाई पठाइदिनुभयो । ईश्वरसहित महासचिव शंकर र शंकरपत्नी सुजिता पनि कार्यक्रममा देखिए । सुजिताचाहिँ उक्त फाँटकी इञ्चार्ज पनि हुन् । अन्तिममा ओली नजानुको कारण हो, आयोजक कमिटीका अध्यक्ष प्रेम पराजुली उहाँलाई मन नपर्नु ।

उनी पार्टीभित्र लामो समय माधव नेपाल समूहका भनी चिनिन्थे, त्यसैले ओलीलाई मन परेन । त्यसमाथि अध्यक्ष बनाइन लागेका मोहन पराजुली तिनैका भाइ । ओलीले ‘अर्कैलाई बनाउनु’ भन्नुभयो, तर ‘सकिँदैन’ भनेबापत उद्घाटन गर्ने भनी पक्कापक्की गरिएको अधिवेशनमै जानुभएन । च्यासलमा शनिबार नै शुरु भएको बन्दसत्रमा अध्यक्ष मोहनसहित उपाध्यक्षमा सर्वसम्मत भयो ।

तर, सचिव र उपसचिवमा राति २ बजेसम्म पनि कुरा मिलेन । निजामती कर्मचारी संगठनका अध्यक्ष लेखनाथ कोइरालाले सचिवमा जिबी (गंगाबहादुर) सुनुवारलाई बनाउने भए बनाउनु, नत्र आर्थिक रुपमा जिल्ला कमिटी चलाउन मबाट सहयोग हुन्न भनी अड्को थापेको र बालकोटले चाहिँ अध्यक्ष सकिँदैन भने सचिवचाहिँ यताको मान्छे बनाउनु भन्दै झापाकी अधिवक्ता कुमारी खरेलको नाम दिएको बताइन्छ ।

लेखनाथले भनेको नमान्न भएन, त्यसमाथि पार्टी अध्यक्षको च्यानलबाट आएको नाम कसरी काट्ने ? यो चेपुवामा परेपछि शनिबार मध्यरात अध्यक्ष र उपाध्यक्ष निर्वाचित भएको घोषणा गर्दै अन्य पदका हकमा सोमबार बागबजारस्थित होटल हार्दिकमा छलफल गर्ने भनी अधिवेशन समापन भयो । हार्दिक पुग्दा अरु त कुरा मिल्यो, सचिव र उपसचिवमा जति गरे पनि सर्वसम्मत गराउनै नसकिने भयो ।

सचिवका लागि प्रस्तावित गंगा सिभिल अस्पतालका लेखापाल लेखनाथजस्तै शिक्षा मन्त्रालयतर्फ लेखा समूहका कर्मचारी हुन् । उपसचिवका निम्ति नेपाल बैंक कर्मचारी संघका अध्यक्ष नवराज लम्सालको दाबी थियो । तर, कृषि विकास बैंकबाट अवकाश पाएका सन्तोष उपनाम लेख्ने शालिग्राम ढकाललाई बनाउने कुरा थियो । यसरी तीन सय १५ प्रतिनिधिका बीच सचिव र उपसचिवमा सोमबार चुनाव हुँदा राति ११ बजे ७० का विरुद्ध ९४ मत ल्याएर गंगा सचिवमा र उपसचिवमा नवराजले जितेका छन् ।  

अर्कातिर, मेलम्ची खानेपानी आयोजनाको भ्रष्टाचारमा अख्तियारले दोषी ठहर गरेको सूचीमा परेका घनश्याम भट्टराई एमालेको विशेष इलाका कमिटीका सदस्य हुन् ।