कार्पेट कारखानामा लागेको आगो चार घण्टापछि नियन्त्रणमा, पौने दुई करोडको सम्पत्ति जलेर खरानी

भक्तपुरको चाँगुनारायण नगरपालिका–२, दुवाकोटस्थित ज्योति प्लाई कार्पेट कारखानामा आगलागी हुँदा पौने दुई करोडको क्षति पुगेको छ । 

गएराति १२ बजे स्थानीय सन्तोषमान श्रेष्ठले सञ्चालन गर्दै आएको उक्त कारखानामा अचानक आगलागी हुँदा एक करोड ८० लाख रुपैयाँ बराबरको धनमाल क्षति भएको प्रहरीले जानकारी दिएको हो । 

आगलागीबाट दुवाकोट बस्ने २३ वर्षीय बुद्धनारायण श्रेष्ठ र सोही कारखानामा काम गर्ने भारत घर भएकी मर्नु उर्वा गम्भीर घाइते भएका छन् । उनीहरुको हाल काठमाडौंस्थित कीर्तिपुर अस्पतालमा उपचार भइरहेको छ । 

जिल्ला प्रहरी परिसर भक्तपुरबाट खटिएको प्रहरी टोली, सशस्त्र प्रहरी बल र स्थानीयको संयुक्त प्रयासमा मध्यरातिबाट सुरु भएको आगो बिहान ४ बजे नियन्त्रणमा आएको थियो । प्रहरीका अनुसार भक्तपुर, काठमाडौं, ललितपुर र काभ्रेबाट ७ वटा दमकल तथा चार वटा पानी ट्यांकर प्रयोग गरिएको थियो । 

अहिले पनि उक्त स्थानमा धुँवा आइरहेकोले दमकल र स्काईभेटरको सहयोगमा निभाउने कार्य जारी रहेको प्रहरीले जनाएको छ ।