हुइँकिएको कारलाई बचाउन खोज्दा बस त्रिशुलीमा

पृथ्वी राजमार्गअन्तर्गत चितवनको इच्छाकामना गाउँपालिका–३ फिस्लिङ बजार नजिकै दुई वटा सवारी दुर्घटनामा पर्दा २० जना भन्दा बढी घाइते भएका छन् । 

नेपालगञ्जबाट काठमाण्डौतर्फ आउँदै गरेको भे १ ख ४०६० नम्बरको यात्रु बस सडकबाट त्रिशुली नदी किनारमा खसेको छ । काठमाण्डौबाट मुग्लिनतर्फ जाँदै गरेको बागमती प्रदेश ०२–०३९ च ३७२० नम्बरको कारले अगाडिको सवारी ओभरटेक गर्ने क्रममा विपरित दिशाबाट आइरहेको बसलाई ठक्कर दिँदा बस सडकबाट नदी किनारमा खसेको प्रत्यक्षदर्शीको भनाई छ । 

तीव्र गतिमा रहेको कारले बसलाई ठक्कर दिएको र कारलाई जोगाउन खोज्दा बस दुर्घटनामा परेको प्रारम्भिक अनुमान छ । जिल्ला ट्राफिक प्रहरी कार्यालय गजुरीका अनुसार कारमा सवार पाँच जना गम्भीर घाइते छन् । ४५ जनाभन्दा बढी यात्रु बोकेको बसका यात्रु भने धेरैजसो सुरक्षित छन् । बस नदीमा नडुबेकोले पनि यात्रुको सुरक्षित उद्दार भइरहेको जिल्ला ट्राफिक प्रहरी कार्यालय गजुरीका प्रहरी निरिक्षक रविन्द्रकुमार श्रेष्ठले जानकारी दिए । 

घाइतेहरुलाई नजिकैको स्वास्थ्य संस्थाहरुमा उपचार गरिँदैछ । गम्भीर घाइतेहरुलाई चितवनतर्फ पठाइएको छ ।