यसरी खुरुखुरु पैसा निकाल्ने चाहि को रहेछ ?

जन आस्था

कात्तिक ६, २०८१

सुन्नुहोस्

सहकारी ठगीमा पक्राउ परेका राष्ट्रिय स्वतन्त्र पार्टी (रास्वपा)का सभापति तथा जिबी राईका तत्कालीन पार्टनर रवि लामिछाने यतिखेर प्रहरी हिरासतमा छन् । शुक्रबार काठमाडौँमा समातिएका र राति नै पोखरा पुर्याइएका उनीमाथि कास्की प्रहरीले सहकारी ठगीसँगै संगठित अपराधमा अनुसन्धान गर्दैछ ।

सूर्यदर्शन सहकारीको बचत हिनामिना अभियोगमा अनुसन्धान जारी रहँदा रविले भने कसूर स्वीकार गरेका छैनन् । सत्ताधारी पार्टीहरुले राजनीतिक प्रतिशोधका आधारमा आफूलाई झूठा मुद्दा लगाउन खोजेको आरोप लगाइरहेका छन् । उनको गिरफ्तारीविरुद्ध रास्वपा संस्थागतरुपमै सडकमा उत्रिएको छ ।

रवि र उनको पार्टीले सहकारी ठगीमा संलग्नता अस्वीकार गर्दै ‘क्लिनचिट’ पाएको प्रचार गराएपनि तथ्यले भने त्यसो भन्दैन । जिबी राई अध्यक्ष रहेको गोरखा मिडिया नेटवर्क प्रालिका तत्कालीन प्रबन्ध निर्देशक रविले विभिन्न सहकारीबाट उक्त मिडियामा आएको ६५ करोड रुपैयाँ आफैँले परिचालन गरेको खुलिसकेको छ ।

देशका प्रमुख शहरमा ‘स’ बाट उच्चारण शुरु हुने नामका आधा दर्जन सहकारी संस्था खोलेर जिबीले गोरखा मिडियामा रकम ओसारेका थिए । सहकारीको रकम निजी कम्पनीमा लगानी गर्न नपाइने विद्यमान कानुन कुल्चेर जिबी र छविलाल जोशीले लगेको रकम रविमार्फत् खर्च भएको हो । संसदीय विशेष छानबिन समितिको प्रतिवेदनमा उक्त कुरा उल्लेख छ ।

तर, जिबीको कारोबारमा आफू जानकार नरहेको बताउँदै आएका रविले समितिमा पनि त्यस्तै बयान दिएका थिए । गोरखा मिडियामा आफूले समाचार प्रमुखका रुपमा काम गरेकाले आर्थिक कारोबारमा जिबी जिम्मेवार हुने बताएका थिए । समितिको प्रतिवेदनमा भने सम्पूर्ण आर्थिक जिम्मेवारी उनैले लिएको तथ्य फेला परेको हो ।

रविले विभिन्न मितिमा हस्ताक्षरसहित १६ वटा चेक काटेका थिए । समितिले आफूलाई प्राप्त विवरण भनि उल्लेख गरेको प्रतिवेदनको ‘बैंक खाता सञ्चालन सम्बन्धमा’ भन्ने शीर्षकमा ती चेकका विवरणहरु छन् । जसमा २३ करोड ७९ लाख ८९ हजार ७ सय ३१ रुपैयाँको चेक काटिएको उल्लेख छ ।