सरकारबाट हटेपछि माओवादीले पत्ता लगायो पार्टी कमजोर बन्दै गएको तथ्य

प्रमुख प्रतिपक्ष दल माओवादी केन्द्रले वर्गीय दृष्टिकोण भुत्ते हुँदा पार्टी कमजोर हुँदै गएको निचोड निकालेको छ । पार्टी मुख्यालय पेरिसडाँडामा बसेको चार दिन लामो पदाधिकारी बैठकले उक्त निष्कर्ष निकाल्दै शुद्धिकरणबाट पार्टीलाई एकताबद्ध बनाई जनतामा जाने कुरामा जोड दिएको छ ।

संसदका दुई ठूला दल नेपाली काँग्रेस र एमाले मिलेर सरकार बनाएसँगै नौ वर्षपछि प्रतिपक्षमा पुगेको माओवादी केन्द्रको पदाधिकारी बैठक शुक्रबारबाट शुरु भएको थियो । चार दिन लामो बैठकमा १८ जनाले आ–आफ्नो धारणा राखेको र सबैजसो नेताले संगठन सुदृढीकरणमा जोड दिएको प्रवक्ता अग्निप्रसाद सापकोटाले बताए । 

बैठकबारे जानकारी दिँदै उनले भने, ‘आजसम्म १८ जना कमरेडले आफ्ना धारणा राख्नुभयो । हामीले समयको पावन्दी तोकेका थिएनौँ । स्पष्ट रुपमा आफ्ना भनाइ राख्न भनेका थियौँ ।’

वर्गीय दृष्टिकोण बोधो भएको र वर्गप्रति जोड दिन नसक्दा पार्टी खुम्चिएको बैठकको निस्कर्ष छ । ‘पार्टी खुम्चिँदै जानुमा वर्गसँगको सम्बन्धमा कमी आउँदै जानु भन्ने रहेको छ । वर्गीय दृष्टिकोण भुत्ते, बोधो भयो । वर्गप्रति जोड दिन नसक्दा पार्टी खुम्चिएको छ । यसमा पनि हाम्रो व्यापक छलफल भएको छ । वर्ग र जनतासँग फर्किनुपर्छ भन्ने निचोड रहेको छ’, सापकोटाले सुनाए ।