प्रधानमन्त्री भदौमा फिल्म हलहरुमा देखिँदै

प्रधानमन्त्री केपी शर्मा ओली अभिनित चलचित्र ‘नमेटिने घाउ’को प्रदर्शन हुने भएको छ । चलचित्रको निर्माण टिमले आज पहिलो पोस्टर सार्वजनिक गर्दै आगामी भदौ ७ गते प्रदर्शन मिति तोकेको छ । 

रमित ढुंगानाद्वारा निर्देशित चलचित्रमा प्रधानमन्त्री ओलीसहित पूर्वप्रधानमन्त्री माधवकुमार नेपाल, सांसदद्वय देवेन्द्र पौडेल र ज्ञानेन्द्र शाही, प्रहरी उपरीक्षकद्वय बालसिंह राणा र कुमुद ढुंगेल, प्रहरी निरीक्षक जेआर शर्मालगायतले अतिथि कलाकारको भूमिका निभाएका छन् । त्यस्तै मुस्कान खातुन, प्राप्ति पौडेल, इभा गिरी, कमल देवकोटा, सन्दीपबाबु लोहनी, रचना गौतम, प्रभात ठकुरी, आरती आचार्यलगायतको अभिनय रहेको छ । 

आज सार्वजनिक पोस्टरमा प्रधानमन्त्री ओलीलाई विशेष प्राथमिकता दिइएको देखिन्छ । नेता नेपाल तथा सांसदहरु पौडेल र शाहीको अनुहार उक्त पोस्टरमा अटाएको छैन ।