उताका सिके पनि महिला हिंसामा, यताको डिभोर्स मुद्दा जारी
लुम्बिनी प्रदेशका पूर्वसामाजिक विकासमन्त्री एवम् जनमत पार्टी प्रदेश सभा सदस्य चन्द्रकेश (सिके) गुप्ताविरुद्ध महिला हिंसासम्बन्धी उजुरी दर्ता भएको छ ।
गुप्तापत्नी कान्तिले राष्ट्रिय महिला आयोग र जिल्ला प्रशासन कार्यालय रुपन्देहीमा गुप्ता र उनको परिवारविरुद्ध मानसिक र शारीरिक हिंसाको आरोप लगाउँदै कारबाहीको मागसहित उजुर हालेकी छन् ।
रुपन्देहीको लुम्बिनी सांस्कृतिक नगरपालिका–७ निवासी गुप्तासँग छ वर्षअघि नवलपरासीको प्रतापपुर गाउँपालिका–९ निवासी कान्तिकुमारी यादवको परम्परागत मागी विवाह भएको थियो । श्रीमान र सासू–ससुराले नियमित रुपमा मानसिक तथा शारीरिक यातना दिएको जनाउँदै पीडित कान्तिले उजुरी दिएपछि प्रमुख जिल्ला अधिकारी गणेश अर्यालले दुवै पक्षलाई राखेर छलफल गराएका थिए । यद्यपि गम्भीर विवाद टुंगो लागेको छैन ।
गत वर्ष पनि गुप्ताविरुद्ध यस्तै उजुरी परेको थियो । त्यतिबेला मन्त्रीको जिम्मेवारीमा रहेकाले आगामी दिनमा पुनः गल्ती नदोहोर्याउने लिखित प्रतिबद्धता जनाएपछि छाडिएको थियो । तर उनी नसुध्रिएकाले उजुरी गर्नुपरेको कान्तिले बताइन् । गुप्ता रुपन्देहीको क्षेत्र नम्बर ५ (२) बाट निर्वाचित प्रदेश सभा सदस्य हुन् । उनीहरुका ४ वर्षकी छोरी र २ वर्षका छोरा छन्।
यता जनमत पार्टीका अध्यक्ष डा. सिके राउतले भने श्रीमतीसँग सम्बन्ध विच्छेदका लागि अदालतमा मुद्दा दायर गरेका छन् । ससुराली खलकले उनले श्रीमतीमाथि १० वर्षदेखि घरेलु हिँसा मच्चाएको आरोप लगाएका छन् । भारतीय नागरिक श्रीमती सोनी सिन्धु रानी सँधै माइत गएर बस्न खोज्ने,विभिन्न बहानामा झगडा गरिरहने भएकाले सम्बन्ध विच्छेद गर्नुपरेको राउतले फिराद पत्रमा उल्लेख गरेका छन् ।
तर सोनीका माइती पक्षको राउतले एक दशकदेखि श्रीमतीमाथि घरेलु हिंसा गरेको आरोप छ । सोनीले सिकेलाई पटक–पटक परस्त्रीसँग रंगेहात फेला पारेको ससुराली पक्षको दावी छ । भनिएको छ, ‘गत स्थानीय तह निर्वाचनअघि र उपराष्ट्रपति निर्वाचनपछि उनी त्यस्तै अवस्थामा फेला परेकाले दम्पतीबीच झडप भएको थियो । सो क्रममा सिके, सोनी र सँगै फेला परेकी महिलालाई चोटपटक लागेको थियो ।’ पटक पटक राउत महिलासँग फेला परेपछि सोनीले एक पटक विष सेवनको प्रयास गरेको माइती पक्षले खुलाएको छ ।
टिप्पणीहरू