प्रकाश श्रीमानविरुद्धको उजुरी पानीको फोकामा फेरिँदै

संवैधानिक परिषद्ले प्रधानन्यायाधीशमा सिफारिस गरेका प्रकाशमानसिंह राउतमाथि खोट लगाउने विषय नभेटे पनि उपसभामुख इन्दिरा राना मगरले उनलाई घरबार बिगारेको गुनासो गरेकी छन् । राउतले भने कानुनी रूपमै धर्मपत्नीसँग पारपाचुके लिएका थिए । राउतविरुद्ध संसदीय सुनुवाइ समितिले उजुरी आह्वान गरे पनि घर बिगारेको विषयले प्राथमिकता नपाउने दावी कानुनविद्हरूको छ । कसैले यो विषय संसदीय समितिमा उठान गरे पनि पानीको फोका सावित हुने दावी गरिँदै छ । त्यसो त राउतमाथि विभिन्न राजनीतिक दल र तिनका प्रभावशाली नेताहरूसँग सम्बन्धित मुद्दा र संवैधानिक इजलासबाट छिनोफानो गर्नुपर्ने कतिपय चर्चित मुद्दालाई पन्छाउँदै बाटो क्लियर गर्दै आएको आरोप पनि लाग्ने गरेको छ । 

राउतलाई सहज सिफारिस गर्नुका पछि दल र तिनका नेताहरूको आ–आफ्नै दाउ चलेको बताइन्छ । एमालेको चाहना संवैधानिक नियुक्ति पाएका ५२ भाइको नियुक्ति बदर नहोस् भन्ने देखिन्छ भने (माओवादी केन्द्र)ले दिनमणि पोखरेललाई सर्वोच्चमा लाने र रास्वपा अध्यक्ष रवि लामिछानेको ध्याउन्न राहदानी, सहकारी र सीधाकुरा डटकमलगायत लफडाबाट सुरक्षित अवतरणको आशा रहेको दावी स्रोतले गरेको छ । राउतलाई सिफारिस गर्दा निर्वाचन आयोगमा लान लागिएका कृष्णमान प्रधानजस्तै संसदीय समितिबाटै कपितय विषय निरूपण गर्न उचित हुने राय दिइएको बताइन्छ । 

न्यायाधीश नियुक्ति सम्बन्धी नियमावली संशोधन गर्न बार एशोसिएसनले दवावस्वरूप सर्वोच्च अदालत घेराउ गरेको थियो । त्यसपछि बार र बेञ्चबीच भएको छलफलमा सर्वोच्च अदालतका न्यायाधीश प्रकाशमानसिंह राउतको संयोजकत्वमा एउटा समिति गठन भयो । जसमा रामप्रसाद भण्डारी, गोपालकृष्ण घिमिरे, अञ्जिता खनाल र न्याय परिषद्का सचिव यम बुढा थिए । त्यसबेला सोको प्रतिवेदनमा मतैक्यता हुन नसकेपछि कार्यान्वयन हुन नपाई त्यत्तिकै थन्किएको छ । त्यसबखत संशोधनकै पक्षमा धेरैको रायविरुद्ध सदस्यसचिव यम बूढा खडा भइदिए । उनले हस्ताक्षर गर्न नमानेपछि प्रतिवेदनले हावा खाएको बताइन्छ । 

(साभार:जनआस्था साप्ताहिकबाट)