रास्वपाको आलोचना गर्दै देउवाद्वारा गठबन्धन नटुट्ने दाबी

सत्तारुढ दल नेपाली कांग्रेसका सभापति तथा पूर्वप्रधानमन्त्री शेरबहादुर देउवाले रवि लामिछाने पक्राऊ पर्दा राष्ट्रिय स्वतन्त्र पार्टीले अनावश्यक हो-हल्ला गर्न आवश्यक नरहेको टिप्पणी गर्नुभएको छ । 

गृहजिल्ला डडेल्धुरा जानेक्रममा आज धनगढी विमानस्थलमा पत्रकारसँग कुरा गर्दै उहाँले त्यस्तो धारणा राख्नुभएको हो । कांग्रेसका नेताहरूलाई मुद्दा लाग्दा आफूहरूले कहिल्यै हल्ला नगरेको जनाउँदै देउवाले रास्वपाले पनि हो-हल्ला गर्न आवश्यक नरहेको बताउनुभयो । 

सहकारी ठगीको आरोपमा सभापति रवि लामिछाने पक्राउ परेपछि रास्वपाका नेता-कार्यकर्ताले पोखरा, काठमाडौँसहित देशका विभिन्न जिल्लामा लगातार विरोध प्रदर्शन गर्दै आइरहेका छन् । सोही प्रसंगमा देउवाले भन्नुभयो, ‘हाम्रा साथीहरुमाथि पनि मुद्धा चलाइएकै हो, हामीले त कहिल्यै हो-हल्ला गरेनौँ । अदालत छ, कानुनको आफ्नै प्रक्रिया छ, अदालतलाई सहयोग गर्ने पो हो त !’

देउवाले वर्तमान गठबन्धमा कुनै समस्या नरहेको पनि स्पष्ट पार्नुभएको छ । गठबन्धनमा दरार आएको भन्ने चर्चाको प्रतिवाद गर्दै भन्नुभयो,  ‘गठबन्धनमा केही समस्या छैन, यो गठबन्धन साँत बुँदे सहमतिअनुसार पूरै समय जान्छ ।’

गठबन्धनलाई कमजोर पार्न अनावश्यक हल्लामात्र फैलाइएको देउवाको दाबी छ ।