डोनाल्ड ट्रम्पको निर्णयले मह जोडीलाई तनाव

वैदेशिक सहायत कटौती गर्ने अमेरिकी राष्ट्रपति डोनाल्ड ट्रम्पको नीतिले नेपालसहित अमेरिकी अनुदान लिने विश्वका विभिन्न मुलुक प्रभावित भएका छन् । 

दोस्रो कार्यकाल अमेरिकी सत्तामा पुगेका ट्रम्पले कार्यभार सम्हालेसँगै कार्यकारी आदेशमार्फत 'डिपार्टमेन्ट अफ गभर्मेन्ट इफिसियन्सी' (डज) स्थापना गरेर विश्वकै सर्वाधिक धनी एलन मस्कलाई नेतृत्व सुम्पिएका थिए । सरकारी खर्च कटौती र विदेशी सहायता तथा अनुदान रोक्ने अधिकार पाएको डज प्रमुख मस्कले विश्वका विभिन्न देशमा सञ्चालित २३० भन्दा बढी परियोजनाको सहायत तत्काल रोक्न राष्ट्रपति ट्रम्पलाई सुझाव दिए । 

छायाँ सरकारको रुपमा रहेको डजको सुझावलाई राष्ट्रपति ट्रम्पले तत्काल कार्यान्वयन गर्न निर्देशन दिएपछि त्यहाँको विदेश मन्त्रालयले सम्बन्धित देशरुलाई पत्र लेखेर ९० दिनका लागि सहायत रोकिएको जानकारी गराएको अवस्था छ । 

ट्रम्प प्रशासनको उक्त निर्णयले नेपालमा पनि युएसएआईडीमार्फत प्रप्त अनुदान सहयोग रोकिएको छ भने मिलेनियम च्यालेञ्ज कर्पोरेशन (एमसीसी) लगायत ६ ठूला परियोजना स्थगनमा परेका छन् । डजले सार्वजनिक गरेको तथ्यांकअनुसार नेपाललमा झण्डै १६ करोड ८१ लाख डलर अर्थात २३ अर्ब ५४ करोड बराबरको अमेरिकी सहायता रोकिएको छ । 

योसँगै यतिबेला सामाजिक सञ्जालमा युएसएएडले नेपाली कलाकार, लेखक, बुद्धिजिवी, मिडिया हाउस र सामाजिक संस्थालाई पैसा दिएर धर्मविरुद्ध प्रचार गर्न लगाएको भन्ने टिप्पणी भइरहेको देखिन्छ । खासगरी हिन्दुविरुद्धको सामाग्री प्रचार गर्न वरिष्ठ कलाकार मदनकृष्ण श्रेष्ठ र हरिवंश आचार्य (मह जोडी)ले करोडौँ पैसा लिएको अपुष्ट समाचार केही दिनयता भाइरल बनिरहेको छ । 

यसैबीच मह जोडीले आज उक्त समाचारको खण्डन गरेका छन् । भिडियो सन्देश जारी गर्दै आरोप अस्वीकार गरेका उनीहरुले अनर्गल प्रचार गरिएकोमा चित्त दु:खेको बताए । हितैषी ठानिएका व्यक्तिहरुबाटै यस्तो भ्रामक प्रचार गरिएको उनीहरुको भनाई छ । 

‘संसारमा राम्रा कुरा पनि छन्, नराम्रा पनि छन्, तर हामीले राम्रा मात्रै छानेर काम गर्दै आएका छौँ’, महले भनेका छन्, ‘कुष्ठरोग, क्षयरोग, खोपजस्ता कुराहरु अधर्मका विषयहरू होइनन्, हाम्रो टेलिफिल्महरु हेरेर जाँच्नु भए हुन्छ ।’

अहिलेसम्म काम गरेका चलचित्र तथा टेलिसिरियलहरुमा कहिल्यै कुनै धर्मको विरोध नगरेको उनीहरुले बताएका छन् । युटुबमा गएर मह जोडीको काम हेर्न आग्रह गर्दै भनिएको छ, ‘हामी दुई फरक फरक चलचित्रको छायांकनमा छौँ । एउटा मदन दाइले खेल्नुभएको छ र एउटा मैले खेलेको छु । यो अनर्गल प्रचार आउनुभन्दा अगाडि नै हामीले भगवनको मन्दिरहरूमा पूजाआजा गरेर फिल्मको शुभारम्भ गरेका थियौँ ।’

उता कतिपय लेखकहरुले पनि युएसएआईडीबाट पैसा लिएको भन्ने समाचारको खण्डन गरेका छन् । लेखकहरु खगेन्द्र संग्रौला, आहुती, नारायण वाग्ले, सिमा आभास, कनकमणि दिक्षितलगायतले पैसा लिएर धर्मको विरोधमा पुस्तक लेखेको भन्ने विषयले बजार गर्माइरहनडा खण्डन गर्नेक्रम जारी छ ।