राजावादीबाट कुटाइ खाने प्रहरी त कति कति

तछारिएको ढाड र शरीरभर चोटपटक । गएको शुक्रबार राजावादी समूहको आन्दोलनमा खटिएका सुरक्षाकर्मीहरुको अवस्था हो यो । राजतन्त्र फर्काउने नाममा अन्धाधुन्द राजावादी समूहको आक्रमणबाट दर्जनौं सुरक्षाकर्मी घाइते भएका छन् । त्यसैमध्ये हुन्,इन्स्पेक्टर तिलक बम । रिजर्भ फोर्स नगर प्रहरी, महेन्द्र पुलिस क्लबमा कार्यरत उनको शरीरभर चोट नै चोट छ । 

आन्दोेलनमा खटिएका उनको कुम, पाखुरा,ढाड,घुँडा,गोडामा गहिरो नीलो डाम बसेको छ । कतै छाला तछारिएको छ । भारी जुत्ता लगाएको गोडामा समेत घाउ भएको छ । शुक्रबार राजधानीको तीनकुने क्षेत्र रणमैदान बन्यो । व्यवस्था परिवर्तनका लागि जम्मा भएको भीड अराजक बन्दा तीनकुने एकाएक कुरुक्षेत्र बन्न पुगेको हो । 

विवादास्पद मेडिकल व्यवसायी तथा राजावादी आन्दोलनका ‘कमाण्डर’ दुर्गा प्रसाईंले राजा फर्काउने नाममा भीडलाई उक्साउँदा अकल्पनीय घटना घटेको छ । झण्डै डेढ सय घाइते भएका छन् भने दुई जनाको ज्यान गएको छ । भीडलाई भड्काएर हिंसामा परिणत गरेका प्रसाईं फरार छन् भने राप्रपाका वरिष्ठ उपाध्यक्ष रविन्द्र मिश्र र महामन्त्री धवलसमशेर राणा पक्राउ परेका छन् । 

युवा धर्मगुरु पुष्कर खतिवडा,राजावादी अभियानमा संलग्न स्वागत नेपाललगायतलाई  प्रहरीले नियन्त्रणमा लिएको छ । सरकारले प्रसाईंको राहदानी कालोसूचीमा राख्ने तयारी थालेको छ । आन्दोलनका संयोजक नवराज सुवेदी आफ्नै घरमा नजरबन्द छन् । शान्तिपूर्ण रुपमा आन्दोलन गर्ने भनेको राजावादी समूहले उत्पात मच्चाउँदा करोडौंको क्षति भएको छ । 

यतिसम्म कि,उनीहरुले व्यक्तिको निजी सम्पत्ति तोडफोड गरेका छन् । निजी सम्पत्तिमा आगो लगाइएको छ । राजावादी आगजनीमा परेर पत्रकार सुरेश रजकको मृत्यु भएको छ । व्यापारिक केन्द्रमा पसेर लुटपाट मच्चाइएको छ । जडीबुटीस्थित औषधी उत्पादन कारखाना ध्वस्त भयो । सरकारी गाडी जलाउनुका साथै एकीकृत समाजवादी पार्टीको केन्द्रीय कार्यालयमा आगजनी गरिएको छ । 

आगोे निभाउन आएको काठमाडौं महानगरपालिकाको दमकललाई समेत छोडिएन । मिडियाको कार्यालयमाथि ढुंगामुढा भयो । विमानस्थलमा आगो लगाउँदा उडान नै बन्द गर्नुपर्ने स्थिति आयो । सरकारले कर्फ्यु लगाएर सडकमा सेना तैनाथ गर्यो । हिजो बिहान ७ बजेपछि मात्रै कर्फ्यु हटाइएको छ । प्रहरीले घटनामा संलग्नलाई भटाभट पक्राउ गरिरहेको छ । 

शान्तिसुरक्षा कायम गर्नका लागि सो दिन ठूलो संख्यामा प्रहरी परिचालन गरिएको थियो । भृकुटीमण्डपमा समाजवादी मोर्चाको कार्यक्रम भएकाले त्यता पनि प्रहरी टोली खटियो । राजावादी समूहलाई तीन कुनेबाट बाहिर निस्किन नदिने प्रहरीको रणनीति थियो । त्यसैअनुरुप घेराबार गरियो । तर, प्रसाईँले भीडलाई भड्काउनका निम्ति प्रहरीलाई कुल्चिने दुस्साहस गरे । 

प्रहरीमाथिबाटै गाडी चलाउन खोजियो । उनको सो कदमपछि भीड उत्तेजित बन्यो । र, प्रहरीमाथि नै हमला गर्न थाल्यो । संयमता अप्नाएर बसेको प्रहरीले शुरुमा अश्रुग्याँस प्रहार गर्यो । त्यसपछि पानीको फोहोरा । हेल्मेट र एउटा सिल्डको भरमा सडकमा उत्रिएका प्रहरीमाथि नै भीड जाइलाग्यो । ढुंगा बर्साउन थालियो । एक जना महिला सशस्त्र प्रहरीको टाउको फुटाइयो । 

एक–डेढ दर्जनको टोलीले घेरेर उनको हेल्मेट लुछेको हो । त्यसपछि उनलाई मरणासन्न हुनेगरी कुटियो । बलिन्द्र रगतको धारा चुहाउँदै उनलाई अस्पताल लैजानुपरेको थियो । प्रहरीहरुलाई ईंट्टा र ढुंगाले लखेटिलखेटी हिर्काएको भिडियोहरु सामाजिक सञ्जालमा छ्याप्छ्याप्ती भेटिन्छ । सिल्ड फुट्दा उनीहरुको ढाडमा ढुंगा लागिरहेको थियो ।

आन्दोलनमा खटिएका प्रहरीका ५३ र सशस्त्रका २२ जना सख्त घाइते भएका छन् । गृह मन्त्रालयबाट बेलैमा गोली हान्ने आदेश नआउँदा मनोबल बढेको भीडले सुरक्षाकर्मीहरुको बन्दुकसमेत खोस्यो । आफ्नो जिम्मेवारी पुरा गर्न ज्यानको बाजी राखेर सडकमा आएका कुनै सुरक्षाकर्मीको अनुहारबाट रगत बगिरहेको थियो भने कसैको हातमा चोटैचोट लागेको थियो । 

अवस्था हेरेर बेलैमा निर्णय लिन नसक्ने र आवश्यक सुरक्षा सामग्रीको व्यवस्थापन पनि गर्न नसक्ने सरकारको कमजोरीका कारण सुरक्षाकर्मीहरु आन्दोलनकारीहरुको निशानामा पर्ने गरेको जानकारहरु बताउँछन् ।