राजावादीहरुले आगो झोसेको कार्यालयमा सरकारी टोली

राजावादी आन्दोलनकारीको हमलामा परेको कोटेश्वरस्थित जडीबुटी उत्पादन तथा प्रशोधन कम्पनी लिमिटेडको यथार्थ अवस्था बुझ्न सरकारी टोली आज त्यहाँ पुगेको छ ।  

वन तथा वातावरणमन्त्री ऐनबहादुर शाही नेतृत्वको टोलीले आज बिहान लिमिटेडको स्थलगत अवलोकन गरेको हो । त्यसक्रमा मन्त्रीले आगजनीबाट भएको भौतिक क्षतिको निरीक्षण गरे । 

काठमाडौँ निर्वाचन क्षेत्र नम्बर २ का सांसद सोबिता गौतमलगायत ११ जनाले पनि आजै त्यहाँको अवलोकन गरेको बताइएको छ । 

चैत १५ गते दुर्गा प्रसाईंको नेतृत्वमा तीनकुनेमा भएको राजावादी प्रदर्शन भड्किएर हिंसामा परिणत हुँदा सरकारी स्वामित्वको जडिबुटी प्रशोधन कम्पनी निशानामा परेको थियो । कोटेश्वरबाट भक्तपुरतर्फ जाँदै गरेको उग्र राजावादी भीडले एकाएक कम्पनीमा प्रवेशगरी आगजनी गरेका थिए ।