चीनले जवाफ दिएलगत्तै अमेरिकी सेयर बजारमा झट्का

अमेरिकी राष्ट्रपति डोनाल्ड ट्रम्पले भन्सार शुल्क बढाएपछि जवाफमा चीनले घोषणा गरेको त्यस्तै करका कारण अमेरिकी सेयर बजार घटेको छ । अमेरिकाले चिनियाँ सामानमा थप ३४ प्रतिशत कर लगाउने बताएपछि चीनले अमेरिकी सामानमा पनि सोही प्रतिशत थप भन्सारको घोषणा गरिसकेको छ । 

चीनको घोषणापछि अमेरिकी सेयर बजार कोरोना महामारीभन्दा अगाडिको अवस्थामा झैं ओरालो लागेको बिबिसीको विश्लेषण छ । चिनियाँ निर्णयको असर जर्मनी, फ्रान्ससँगै एसियाली मुलुकको सेयर बजारमा पनि परेको छ ।

तर,राष्ट्रपति ट्रम्पले बजार ओरालो लागिरहँदा पनि अमेरिकीहरुलाई आश्वस्त पार्दै नआत्तिन भनेका छन् । उनले सामाजिक सञ्जालमा ‘हामी हार्न सक्दैनौं’ लेखेका छन् । अमेरिकी राष्ट्रपतिले आन्तरिक श्रम बजार बलियो रहेको दाबी गरेका छन् ।

चीनले ट्रम्पका कदमलाई ‘धम्की’ र ‘अन्तर्राष्ट्रिय व्यापार नियमहरूको उल्लङ्घन’ को उपमा दिएको छ । चीनले अमेरिका निर्यात हुने मुख्य खनिजहरूमा रोक लगाएको छ भने केही अमेरिकी कम्पनीहरूलाई कालोसूचीमा राखिदिएपछि विश्व बजारमा हलचल आएको छ । विश्वमा छिट्टै आर्थिक मन्दी आउने चेतावनीसहित विज्ञहरुले अमेरिकी आर्थिक बृध्दिदरमा चालु वर्ष कम्तीमा २ प्रतिशतले कमी आउने प्रक्षेपण गरेका छन् ।