त्रिविको ६३ औं ग्रेसलिष्ट पारितसँगै ‘समृद्ध नेपाल, सुःखी नेपाली’ को संकल्पमा जोड

त्रिभुवन विश्वविद्यालय (त्रिवि) को ६३ औं ग्रेसलिष्ट पारित भएको छ । बालुवाटारस्थित प्रधानमन्त्रीको सरकारी निवासमा आज बसेको विश्वविद्यालयको वार्षिक साधारणसभाले विभिन्न संकाय र तहमा उत्तीर्ण भएका ८९ हजार १९१ विद्यार्थीसहितको ग्रेसलिष्ट पारित गरेको हो । 

प्रधानमन्त्री तथा विश्वविद्यालयका कूलपति केपी शर्मा ओलीको अध्यक्षतामा भएको बैठकमा रजिष्ट्रार प्रा.डा.केदारप्रसाद रिजालले ग्रेसलिष्ट प्रस्तुत गर्नुभएको थियो । सो ग्रेसलिष्ट पारित भएको प्रधानमन्त्रीको सचिवालयले जनाएको छ । त्यसैगरी, बैठकमा आर्थिक वर्ष २०८२–८३ को बजेट तथा कार्यक्रम पनि पेश गरिएको थियो । 

बैठकमा बोल्दै कूलपति ओलीले त्रिविलाई एक्काइसौं शताब्दीसँग सुहाउँदो प्रतिस्पर्धी र सक्षम विश्वविद्यालयका रुपमा स्थापित गर्न आग्रह गर्नुभयो । शिक्षा, विज्ञान तथा प्रविधिमन्त्री तथा सहकुलपति रघुजी पन्तले ‘समृद्ध नेपाल, सुःखी नेपाली’ को राष्ट्रिय संकल्प पूरा हुनेगरी काम गर्नुपर्नेमा जोड दिनुभयो ।