माधव नेपालनिकट युवा संघद्वारा भारतीय दूतावासअगाडि प्रदर्शन

भारतीय सीमा सुरक्षा बलको अमानवीय कार्यको बिरोध गर्दै नेकपा एमालेको नेपाल समूह निकट युवा संघ नेपालले आज राजधानीमा प्रदर्शन गरेको छ । आज अपरान्ह लैनचौरबाट नाराबाजी गर्दै भारतीय दूतावास अगाडिको खानी विभागसम्म पुगेर संघले बिरोध गरेको हो ।

महाकाली नदी तर्दै गर्दा भारतीय सुरक्षा बल एसएसबीले तुइनको लठ्ठा फुस्काएपछि जयसिंह धामी महाकालीमा बेपत्ता भएका हुन् । प्रदर्शनमा संंघका अध्यक्ष नरेशकुमार शाही,महासचिव दिपक जिएमलगायत पाँच दर्जन बढीको उपस्थिति थियो ।

उनीहरुले भारतीय विस्तारवाद मूर्दावाद,युवासंघ नेपाल जिन्दावाद,जयसिंह धामीको मृत्यु होइन हत्या हो, नेपाली जनतामाथिको भारतीय एसएसबीको ज्यादती बन्द गर जस्ता नारा लगाएका थिए । यसैबीच गृहद्वारा गठित छानबिन टोली डडेल्धुरामा बास बस्नेगरी अहिले हगुल्टेको लेकतिर उकालो लागेको छ ।