पेस्तोल बेच्ने भारतीयको जिल्ला जिल्लामा नेटवर्क

भारतसँग सिमाना जोडिएका तराईका जिल्लामा आपराधिक घटना बढिरहेका बेला सोमबार हतियारको अवैध कारोवारमा संलग्न दुई भारतीय नागरिक पेस्तोलसहित समातिएका छन् । सुनसरीको कोशी गाउँपालिका–१ स्थित बी.एस. होटलबाट प्रहरीले दुई भारतीय युवालाई पेस्तोलसहित पक्राउ गरेको हो ।

पक्राउ पर्नेमा भारतको बिहार अररिया, बासमटियाका ३५ वर्षीय विद्यानन्द राम र २४ वर्षका हासिम अन्सारी हुन् । उनीहरुलाई हिजो जिल्ला अदालत सुनसरीबाट म्याद थप गरि आवश्यक अनुसन्धानका लागि जिल्ला प्रहरी कार्यालय सुनसरीमा राखिएको छ ।

प्रहरीको प्रारम्भिक अनुसन्धानबाट उनीहरु पहिलेदेखि नै हातहतियारको कारोवारमा संलग्न रहेको खुलेको छ । नेपालमा आएर हातहतियारका ग्राहक खोज्ने र अर्डर अनुसार सप्लाई गर्ने काममा उनीहरुको संलग्नता भेटिएको अनुसन्धानबाट खुलेको जिल्ला प्रहरी कार्यालय सुनसरीका प्रहरी उपरीक्षक सञ्जय थापाले जानकारी दिनुभयो ।

थापाका अनुसार उनी बेला बखत ग्राहक खोज्न नेपाल आउने गर्थे । तर, नेपालमा कसकोमा हतियार पुर्याउँथे भन्ने विषय भने अझै खुलेको छैन । पक्राउ परेका अन्सारी र रामका साथबाट होटलको बेडमुनी लुकाइएको अवस्थामा पेस्तोल दुई थान, म्याग्जिन चार थान, ७ दशमलब ६५ एमएम गोली तीन राउण्ड बरामद भएको थियो भने मोबाइल १ थान, बीआर ५० के ०१४९ नम्बरको मोटरसाइकल र भारतीय रुपैयाँ दुई हजारसमेत बरामद भएको छ ।

उनीहरुले नेपालमा कसलाई पेस्तोल बेच्न लागेका थिए भन्नेबारेमा अनुसन्धान भइरहेको र पुष्टि हुन केही समय लाग्न सक्ने थापाले जनआस्थासँगको कुराकानीमा बताउनुभएको छ । खुल्ला सीमाना भएकाले लागुऔषध तथा हातहतियार ओसारपसारका घटना बढ्दै गएको र त्यसले सुरक्षा चुनौती बढाएको पनि उहाँले स्वीकार्नुभयो ।