हत्या गरिएकी महिलाको परिवारलाई न्याय माग्दै इन्सेक

खोटाङमा विभत्स तरिकाले हत्या गरिएका तीन महिलाको परिवारलाई न्याय दिलाउन अनौपचारिक क्षेत्र सेवा केन्द्र (इन्सेक) ले माग गरेको छ ।

जिल्ला प्रशासन कार्यालयमार्फत गृहमन्त्रालयलाई ज्ञापन–पत्र पठाउँदै इन्सेकले २६ माघ २०७३ मा मृत अवस्थामा फेला परेकी खोटेहाङ गाउँपालिका–९ लिच्कीराम्चेकी १७ वर्षीया रिता तामाङ, हलेसी तुवाचुङ नगरपालिका–७ महादेवस्थानकी ५७ वर्षीया ज्ञानीमायाँ विश्वकर्मा र ४ साउन २०७४ मा हत्या गरिएकी ३७ वर्षीया जन्तेढुंगा गाउँपालिका–६ दिप्लुङकी देवी विकको परिवारलाई न्याय दिन माग गरेको हो ।

इन्सेक प्रतिनिधि तारानाथ फुयाँलले प्रमुख जिल्ला अधिकारी फणिन्द्र दाहालमार्फत बुझाइएको ज्ञापनपत्रमा जघन्य अपराधका घटनाका दोषीलाई पहिचान गरी कानुनी कठघरामा उभ्याएर पीडित परिवारलाई न्यायको प्रत्याभूति गराउन माग गरिएको छ ।

तीन महिलाको हत्या भएको वर्षौं बिते पनि दोषीलाई प्रहरीले अहिलेसम्म पहिचान गर्न सकेको छैन ।

प्रहरीको अनुसन्धान टोलीबाट दोषी पत्ता लाग्न नसक्दा प्रहरी अनुसन्धानमाथि नै प्रश्न उठेको फुयाँलले बताएका छन् । महिलाहरुको हत्यामा संलग्न पत्ता लगाउन नसकेको भन्दै जिल्लामा प्रहरी प्रशासनको आलोचना भने भइरहेको छ ।