मोटरसाइकल चोरको ग्याङ तहसनहस,६ जना पक्राउ

झापामा मोटरसाइकल चोरहरुको संगठित गिरोहलाई प्रहरीले तहसनहस पारेको छ । एक भारतीयसहित सात वटा नेपाली नम्बरप्लेटका मोटरसाईकल चोरहरुलाई प्रहरीले आज कर्याप्प पारेको हो ।

प्रहरीको खोरमा पुग्नेहरुमा भद्रपुर नगरपालिका-७ का २१ वर्षीय प्रकाश सहनी, २४ वर्षीय प्रकाश दर्जी, २१ वर्षीय दिपक उराव, २२ वर्षीय दिपेश राजवंशी, भद्रपुर नगरपालिका-१ का ३० बर्षीय बिर्ख लिम्बु र भारत किसनगंजका १९ वर्षीय महम्मद समिम रहेका छन् ।

केही सातादेखि झापाका विभिन्न स्थानहरुमा मोटरसाईकल चोरीको लिखित निवेदनको चाङ लाग्न थालेपछि प्रहरीले सुक्ष्म निगरानी थालेको थियो । त्यसैक्रममा प्रकाश सहनीलाई पक्राउ गरेपछि गिरोहका अन्य सदस्यहरु पनि धमाधम समातिएका हुन् ।

सहनीले मोटरसाईकल चोरी गरी बिक्री गर्ने गरेको भन्ने गोप्य सूचनाको आधारमा प्रहरीले व्यापक खोजी गरेको थियो । सहनीले दिएको बयानका आधारमा चोरीमा संग्लग्न अन्य ५ जनासमेत पक्राउ परेका हुन् । उनीहरुले विभिन्न समयमा विभिन्न स्थानबाट चोरी गरेका ७ थान मोटरसाईकलसमेत प्रहरीले बरामद गरेको छ ।

घटनाबारे थप अनुसन्धान भईरहेको प्रहरीले जनाएको छ ।