पूर्वमा लागुपदार्थ बेच्ने र सेवन गर्ने उत्तिकै

मोरङ र झापाबाट लागुऔषधको कारोबार गरेको आरोपमा प्रहरीले दुई जनालाई पक्राउ गरेको छ । मोरङको केराबारी गाउँपालिका–७, मुगुटोलबाट पक्राउ परेका सहिदभूमि गाँउपालिका–१ का ३१ वर्षीय दिपेश राई हुन् ।

उनी सवार को. २३ प ३८६१ नम्बरको मोटरसाइकललाई चेकजाँच गर्दा मोटरसाइकल पछाडि बाँधेर राखेको जेब्रा झोलामा ६५ किलोग्राम गाँजा बरामद भएको हो ।

त्यसैगरी ब्राउनसुगरसहित प्रहरीले झापाको मेचीनगर नगरपालिका–१२, कालिझोडाबाट १८ वर्षीय अविनारायण लिम्बुलाई पक्राउ गरेको छ ।

उनी मोरङको गोविन्दपुर घर भई मेचीनगर नगरपालिका–१२ मा बस्दै आएका थिए । लिम्बुलाई इलाका प्रहरी कार्यालय बुधबारेले हिजो घरबाटै पक्राउ गरेको हो ।

लिम्बुको साथबाट प्रहरीले २१ दशमलब ३८ ग्राम ब्राउनसुगर र एक थान डिजिटल तराजुसमेत बरामद गरेको हो । पक्राउ परेका दुवैविरुद्ध अनुसन्धान भइरहेको प्रहरीले जनाएको छ ।