लाखको बिटोसहित कर्मचारी रंगेहात समातिए

नापी कार्यालय चाबहिलअन्तर्गत बूढानीलकण्ठमा कार्यरत दुई जना कर्मचारी घुस रकमसहित समातिएका छन् ।

चाबहिलको १ नम्बर नापी टोली, बुढानीलकण्ठमा कार्यरत सर्भेक्षक विनोद के.सी. र अमिन प्रकाशराज भट्टलाई एक लाख रुपैयाँ घुससहित नियन्त्रणमा लिइएको अख्तियार दुरुपयोग अनुसन्धान आयोगले जनाएको छ । ‘

सर्भेक्षक के.सी. र अमिन भट्टले जग्गाको हालसाबिक गर्ने क्रममा सेवाग्राहीसँग घुस मागेको सूचना र उजुरीका आधारमा आयोगबाट खटिई गएको टोलीले उनीहरुलाई सेवाग्राहीबाट घुस लिइसकेको अवस्थामा घुसको बिटोसहित पक्राउ गरेको हो ।

उनीहरुलाई ललितपुर महानगरपालिका–५, लगनखेल, महालक्ष्मी मार्गबाट नियन्त्रणमा लिई थप अनुसन्धान भइरहेको आयोगका प्रवक्ता श्यामप्रसाद भण्डारीले जानकारी दिएका छन् ।