दुई मोटरसाइकल आपसमा ठोकिंदा दुई जनाको मृत्यु

कैलालीमा दुईवटा मोटरसाइकल आपसमा ठोक्किंदा दुई जनाको ज्यान गएको छ । हिजो राति गोदावरी नगरपालिका–३ मा दुईवटा मोटरसाइकल आपसमा ठक्कर खाँदा दुई जनाको ज्यान गएको हो भने दुई जना घाइते भएका छन् ।

प्रहरीका अनुसार सुदूरपश्चिम प्रदेश ०२–००४ प १११ नम्बरको मोटरसाइकल र से ४ प ४७३० नम्बरका मोटरसाइकल आपसमा ठोकिएर उक्त दुर्घटना भएको हो । दुर्घटनामा कञ्चनपुरको शुक्लाफाँटा नगरपालिका-७ घर भएका ३० वर्षीय पुरन कुमार मडै र कैलालीकै कृष्णपुर-५ बस्ने ३२ वर्षीय लोकेन्द्र पार्कीको मृत्यु भएको छ । मृतक दुवै जना मोटरसाइकल चालक रहेको प्रहरीले जनाएको छ ।

दुर्घटनामा गम्भीर घाइते भएका उनीहरुको उपचारको क्रममा धनगढीस्थित सेती प्रादेशिक अस्पतालमा निधन भएको हो । दुर्घटनामा मोटरसाकलको पछाडि बस्ने घाइते दुई जनाको स्थानीय अस्पतालमा उपचार भइरहेको प्रहरीले जानकारी दिएको छ ।