सारजाहाबाट आएकाहरु काठमाडौं ओर्लने बितिक्कै पुलिसको फन्दामा

संयुक्त अरब इमिरेट्स (यूएई)को सारजाहाबाट आएका तीन जना नेपाली युवा अवैध सुनसहित समातिएका छन् । एयर अरेबियाको उडानद्वारा काठमाडौँ आएका उनीहरु लुकाएर सुनको सिक्री छिराउन खोज्दा त्रिभुवन अन्तर्राष्ट्रिय विमानस्थलबाट प्रहरीको फन्दामा परेका हुन् ।

विमानस्थलको आगमन टनेल गेट अगाडिबाट रसुवा नौकुण्ड गाउँपालिका–१ घर भएका ३२ वर्षिया सुकुराम लामा, २७ वर्षिय पेम्बा थोक्रा र २२ वर्षिय बुद्धिमान तामाङ अवैध सुनसहित समातिएको विमानस्थल प्रहरीले बताएको छ ।

प्रहरीका अनुसार उनीहरुको साथबाट दुई–दुई थान सुनको सिक्री भेटिएको थियो । ९९.८८ ग्राम अवैध सुन भन्सार छली लैजाने क्रममा उनीहरु पक्राउ परेको प्रहरीको भनाइ छ ।

उनीहरुलाई थप अनुसन्धानका लागि त्रिभुवन विमानस्थल भन्सार कार्यालय गौचरमा बुझाइएको विमानस्थल प्रहरीले बताएको छ ।