शौचालयमा चिर्पटले हानेर श्रीमती मार्ने श्रीमान समातिए

उदयपुरको कटरी नगरपालिका–५, बरमजियामा चिर्पटले हानेर श्रीमानले श्रीमतीको हत्या गरेका छन् । शौचालयमा बसिरहेकी ३७ वर्षीया नानु खनाललाई चिर्पटले हानेर उनकै श्रीमान पोष्टराज दाहालले हत्या गरेका हुन् ।

घरायसी विवादमा मुर्मुरिएका दाहालले शौचालयमा बसिरहेकै समयमा त्यहाँ गएर श्रीमतीलाई दाउराको चिर्पटले हिर्काएका थिए । उनलाई हत्या गरेको अभियोगमा इलाका प्रहरी कार्यालय कटारीले पक्राउ गरेको हो ।

चिर्पट प्रहारबाट श्रीमतीको घटनास्थलमा नै ज्यान गएको थियो । प्रहरीले घटनास्थलको प्रकृति मुचुल्का तयार गरी शवलाई पोष्टमार्टमको निम्ति कटारी अस्पताल लगिएको छ । प्रहरीले घटनाबारे थप अनुसन्धान भइरहेको जनाएको छ ।