घरभित्र छिरेर मोटरसाइकल चोर्ने दुई जना अदालतमा

प्रहरीले तनहुँमा मोटरसाइकल चोरेको आरोपमा दुई जनालाई पक्राउ गरेको छ । शुक्लागण्डकी नगरपालिका-११ साँखेको एक घरमा पार्किङ गरेको मोटरसाइकल चोरेर भाग्ने क्रममा उनीहरुलाई प्रहरीले हिजो नियन्त्रणमा लिएको हो ।

साँखे घर भएका ४३ वर्षीय भीमबहादुर थापाले आफ्नै घरमा ध.१ प ५५९३ नम्बरको मोटरसाइकल पार्किङ गरेर राखेका थिए । घरमा कोही नभएको मौका पारेर उनीहरुले सो मोटरसाइकल चोरी गरेको प्रहरीले बताएको छ ।

पक्राउ पर्नेमा स्याङ्जा हरिनास गाउँपालिका चिसापानीस्थित सडक निर्माण गर्ने क्याम्पमा बस्ने २० वर्षीय नाईजेल ठकुरी र सोही ठाउँ बस्ने १९ वर्षीय खिममान पुन छन् ।

बेलचौतारा तनहुँबाट खटिएको प्रहरीले स्थानीयको सहयोगमा शुक्लागण्डकी नगरपालिका-८ स्थित पुलचोकबाट उनीहरूलाई मोटरसाइकलसहित पक्राउ गरेको हो । दुवै जनाविरुद्ध तनहुँ जिल्ला अदालतबाट सात दिन म्याद थप अनुमति लिई अनुसन्धान भईरहेको प्रहरीले जनाएको छ ।